Մայիսի 25-ին Հայաստանի արհմիությունների կոնֆեդերացիայում տեղի ունեցավ հանդիպում Աշխատանքի միջազգային կազմակերպության գենդերային հավասարության և խտրականության դեմ պայքարի հարցերով փորձագետ Օզգե Բերբերի և ԱՄԿ ազգային համակարգող Նունե Հովհաննիսյանի հետ։
Հանդիպման ընթացքում քննարկվեցին տնային աշխատանք կատարողների աշխատանքային իրավունքների պաշտպանությանն առնչվող մի շարք կարևոր հարցեր՝ անդրադառնալով ոլորտում առկա մարտահրավերներին, սոցիալական պաշտպանության մեխանիզմներին և արժանապատիվ աշխատանքի ապահովման անհրաժեշտությանը։
Առանձնահատուկ ուշադրություն դարձվեց Աշխատանքի միջազգային կազմակերպության թիվ 189 կոնվենցիային, որը վերաբերում է տնային աշխատանք կատարողների արժանապատիվ աշխատանքին։ Քննարկվեց կոնվենցիայի արդիականությունը Հայաստանի համար, դրա հնարավոր ազդեցությունը աշխատանքային իրավունքների պաշտպանության, աշխատանքային պայմանների բարելավման և խտրականության կանխարգելման տեսանկյունից։
Հանդիպման ընթացքում փորձագետ Անի Հովհաննիսյանը ներկայացրեց նաև «Հայաստանում ոչ ֆորմալ և տնային աշխատողների արհմիության կազմակերպման փորձից քաղված դասեր» զեկույցը։ Զեկույցում անդրադարձ կատարվեց ոչ ֆորմալ և տնային աշխատողների կազմակերպման փորձին, առկա դժվարություններին, աշխատողների ներգրավվածության մեխանիզմներին, ինչպես նաև արհմիությունների դերի կարևորությանը նրանց իրավունքների պաշտպանության գործում։
Առանձնահատուկ ուշադրություն դարձվեց նաև նորաստեղծ «Ինքդ» արհմիութենական կազմակերպության գործունեությանը և դրա նշանակությանը տնային աշխատանք կատարողների շահերի ներկայացման և պաշտպանության տեսանկյունից։
Կողմերը վերահաստատեցին համագործակցության շարունակականության կարևորությունը՝ ուղղված աշխատանքի ոլորտում հավասար հնարավորությունների խթանմանը, խտրականության դեմ պայքարին և արժանապատիվ աշխատանքի սկզբունքների ամրապնդմանը Հայաստանում։
