Արդեն տևական ժամանակ է Գործադիրը նախաձեռնել է <<ՀՀ աշխատանքային օրենսգրքի>>, <<Արհմիությունների մասին>> ՀՀ օրենքների փոփոխություններ և «Գործատուների կազմակերպությունների մասին» նոր օրենքի ընդունում։ Նշված իրավական ակտերի նախագծերն արդեն իսկ ստացել են նախնական փորձագիտական մեկնաբանություններ։
Հայաստանի արհմիությունների կոնֆեդերացիայի կողմից ներկայացված առաջարկներն ու դիտողությունները լսելու, ինչպես նաև դրանք քննարկելու նպատակով 2024թ․ մարտի 12-ին Աշխատանքի միջազգային կազմակերպության Արևելյան Եվրոպայի և Կենտրոնական Ասիայի գրասենյակի Աշխատանքի միջազգային ստանդարտների և Աշխատանքային իրավունքի մասնագետ Միրանդա Ֆաջերմանը հանդիպեց ՀԱՄԿ ներկայացուցիչների հետ։
Հանդիպման ընթացքում ՀԱՄԿ ներկայացուցիչները մանրամասն ներկայացրին նախագծերի վերաբերյալ արհմիությունների առաջարկներն ու մտահոգությունները, ինչպես նաև միավորման ազատության և կոլեկտիվ բանակցությունների իրավունքների իրականացման ընթացքում հանդիպող իրավական խոչընդոտները, մասնավորապես՝ «Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» ՀՀ օրենքը արհմիության ներկայացուցիչների վրա տարածելու, արհեստակցական կազմակերպությունների պետական գրանցման համար սահմանված պետական տուրքերի, գործադուլի, ԱՄԿ 190 կոնվենցիայի վավերացման և այլ հարցեր։
Տիկին Ֆաջերմանը խոստացավ հաշվի առնել ՀԱՄԿ կողմից բարձրացված հարցերը ՀՀ Կառավարության ներկայացուցիչների հետ նախագծերի քննարկման ընթացքում։
