Մարտի 31-ին Երևանի Holiday.Inn հյուրանոցում Հայաստանի «Էլեկտրաարհմիություն» արհեստակցական կազմակերպությունների ճյուղային հանրապետական միությունը IndustriALL Գլոբալ միության աջակցությամբ անցկացրեց սեմինար «Արդար անցում» թեմայով՝ նվիրված կլիմայի փոփոխության, արդեն իսկ սկսված անցումը դեպի «կանաչ» էներգետիկայի, վերականգնվող էներգիայի և արհմիությունների դերը արդար անցումային գործընթացում հարցերին: Սեմինարի աշխատանքներին մասնակցում էին IndustriALL Գլոբալ միության ներկայացուցիչ Վադիմ Բորիսովը, Հայաստանի «Էլեկտրաարհմիություն» արհեստակցական կազմակերպությունների ճյուղային հանրապետական միության, Հայաստանի արդյունաբերության աշխատողների արհեստակցական կազմակերպությունների ճյուղային հանրապետական միության, Հայաստանի լեռնագործների, մետալուրգների և ոսկերիչների արհեստակցական կազմակերպությունների ճյուղային հանրապետական միության ներկայացուցիչները, որոնք հանդիսանում են IndustriALL Գլոբալ միության անդամ կազմակերպություններ:
Սեմինարն անցկացվել է անցանց և առցանց ձևաչափերով՝ Գերմանիայի և Շվեյցարիայի փորձագետների մասնակցությամբ։
Հանրապետությունում տիրող իրավիճակը ներկայացրել են Հայաստանի Հանրապետության տարածքային կառավարման և ենթակառուցվածքների նախարարության վերականգնվող էներգետիկայի վարչության պետ Վիկտորյա Քեշիշյանը և Հայաստանի վերականգնվող էներգիայի և էներգախնայողության հիմնադրամի վերլուծական խմբի ղեկավար Նորայր Հարությունյանը։ Սեմինարի մասնակիցները ընդգծերցին, որ արհմիությունները պետք է տեղ զբաղեցնեն բանակցությունների սեղանի շուրջ, որպեսզի վերականգնվող էներգիայի աղբյուրներին արդար անցումը քննարկելիս՝ աշխատանքային պայմանների վերաբերյալ հարցերը լինեն պարտադիր:
Տեղի ունեցավ հետաքրքիր քննարկում. Սեմինարի արդյունքներն ամփոփեց Վադիմ Բորիսովը։
