Հայաստանի արհմիությունների կոնֆեդերացիայի նախագահ Էլեն Մանասերյանը և Արցախի արհմիության ներկայացուցիչ Արա Ղահրամանյանն այցելեցին Երևանում գործող Հադրութի մանկապատանեկան ստեղծագործական կենտրոն ծանոթանալու Արցախից բռնի տեղահանված մեր հայրենակիցների հետ, ովքեր աշխատում են կենտրոնում:

Հադրութի մանկապատանեկան ստեղծագործական կենտրոնի տնօրեն Իրա Թամրազյանը ծանոթացրեց աշխատողների աշխատանքային պայմանների հետ, ներկայացրեց կենտրոնում տիրող իրավիճակն ու առկա խնդիրները:

Կենտրոնը Հայաստանում գործում է շուրջ երեք տարի, ունի մի քանի մասնաճյուղեր, առկա է 47 խումբ, որտեղ հաճախում են շուրջ 420 երեխա Երևանում և տարբեր մարզերում: Կենտրոնն ունի 26 աշխատակից, հիմնականում կանայք են, որոնց համար անասելի կարևոր է կենտրոնի գործունեությունը, քանի որ 2023թ բռնի տեղահանումից հետո սա նրանց հիմնական աշխատանքային զբաղվածությունն է:

Կենտրոնի աշխատանքների կազմակերպման և աշխատող կանանց աշխատանքային պայմաններն առավել արդյունավետ կազմակերպելու նպատակով Հայաստանի արհմիությունների կոնֆեդերացիայի և Աշխատանքի միջազգային կազմակերպության համատեղ ծրագրի շրջանակներում Կենտրոնին կտրամադրվի աջակցություն։