Աշխատանքի միջազգային կազմակերպության նախաձեռնությամբ յուրաքանչյուր տարի ապրիլի 28-ը նշվում է որպես աշխատանքի անվտանգության և առողջության համաշխարհային օր, որի նպատակն է նպաստել աշխատավայրում դժբախտ դեպքերի և մասնագիտական հիվանդությունների կանխարգելմանը:
 Աշխատանքի անվտանգության և առողջության 2024թ. համաշխարհային օրվա թեման է «Կլիմայի փոփոխության ազդեցությունը աշխատանքի անվտանգության և առողջության վրա» :
 Կլիմայի փոփոխությունը զգալի ազդեցություն է ունենում աշխատանքի ոլորտի` հատկապես աշխատողների անվտանգության և առողջության վրա: Կլիմայի փոփոխության հետևանքով առաջացող մասնագիտական ռիսկերից են՝ ջերմային սթրեսը, ուլտրամանուշակագույն ճառագայթումը, օդի աղտոտվածությունը, խոշոր արդյունաբերական վթարները,  վարակիչ հիվանդությունների աճը և քիմիական նյութերի ազդեցության ավելացումը:
 Աշխատողների առողջ և անվտանգ աշխատանքի ապահովումը պետք է ուղղված լինի աշխատողների ֆիզիկական, հոգեբանական և սոցիալական բարեկեցության խթանմանը և պահպանմանը, առողջության վրա բացասական ազդեցություն ունեցող ռիսկերից պաշտպանությանը:
 Աշխատավայրում անվտանգության և առողջության համակարգերի կիրառումը նպաստավոր է  ոչ միայն աշխատողների, այլ նաև կազմակերպությունների  տնտեսական զարգացման համար, քանի որ աշխատանքի վայրում տեղի ունեցած յուրաքանչյուր դժբախտ դեպք, որպես հետևանք, առաջ է բերում մեծ ֆինանսական ծախսեր, որոնք բազմակի անգամ գերազանցում են առողջ և անվտանգ աշխատանքի միջավայրի ապահովման միջոցառումների արժեքը:
 Հայաստանի արհմիությունների կոնֆեդերացիան միանում է  աշխատանքի անվտանգության և առողջության համաշխարհային օրվան նվիրված Աշխատանքի միջազգային կազմակերպության  նախաձեռնությանը  և  գտնում է, որ առողջ և անվտանգ աշխատանքային պայմանների արդյունավետ ապահովման համար պետական քաղաքականությունը պետք է ուղղված լինի աշխատողների կյանքի, առողջության և անվտանգության պահպանմանը, քանի որ առողջ և անվտանգ աշխատանքային պայմանները արժանապատիվ աշխատանքի կարևորագույն  բաղադրիչներից  են:
     
ՀԱՅԱՍՏԱՆԻ ԱՐՀՄԻՈՒԹՅՈՒՆՆԵՐԻ
ԿՈՆՖԵԴԵՐԱՑԻԱՅԻ ՆԱԽԱԳԱՀ    
ԷԼԵՆ ՄԱՆԱՍԵՐՅԱՆ