Փետրվարի 9-ին Հայաստանի արհմիությունների կոնֆեդերացիայի նախագահ Էլեն Մանասերյանը և նախագահի տեղակալ Տիրուհի Նազարեթյանը հանդիպեցին Մարդու իրավունքների պաշտպան Անահիտ Մանասյանի հետ։
Քննարկման առանցքային թեմաներն էին՝ Հայաստանի Հանրապետությունում աշխատանքային իրավունքի ոլորտում առկա խնդիրները, այդ թվում՝ աշխատողների աշխատանքային և սոցիալական իրավունքների պաշտպանությանն առնչվող հարցերը։ Անդրադարձ կատարվեց գործադուլի իրավունքի իրացման հետ կապված խնդիրներին, այս ոլորտում լուրջ օրենսդրական ու ինստիտուցիոնալ փոփոխություններ կատարելու անհրաժեշտությանը։
Քննարկվեցին նվազագույն աշխատավարձի սահմանման, առողջ և անվտանգ աշխատանքային պայմանների երաշխավորման, միավորման ազատության իրավունքի իրացման, աշխատանքային իրավունքների պաշտպանության անհրաժեշտ կառուցակարգերի բացակայության, ինչպես նաև ոլորտում արձանագրվող ընթացիկ գործընթացներին վերաբերելի հարցեր։
Էլեն Մանասերյանն անդրադարձավ աշխատանքայւն իրավահաևաբերությունների ոլորտում Ախթալայի Լեռնահարստացման կոմբինատում այս օրերին առկա իրավիճակին, հատկապես աշխատողների առողջ և անվտանգ աշխատանքային պայմանների բացակայությանը։
Կարևորվեցին նաև աշխատանքային վեճերով դատական վճիռների և որոշումների կատարման խնդիրներին։
Կողմերը հաստատեցին ոլորտում ինստիտուցիոնալ համագործակցության ամրապնդման կարևորությունը։
