Հայաստանի արհմիությունների կոնֆեդերացիան մարտի 7-10-ը Ծաղկաձորում կազմակերպել էր "Արհմիութենական սպորտ 2024" խորագրով արհմիութենական-սպորտային միջոցառում, որի ընթացքում իրականացվեցին մրցույթներ հինգ սպորտային անվանակարգերում՝ սեղանի թենիս, շախմատ, բազկամարտ, բոուլինգ և դարթս։
Սպորտային միջոցառումներից զատ առավոտները հագեցած էին արհմիութենական թեմաներով մի քանի զրուցարաններով, հրավիրված էին ոլորտին և խնդիրներին քաջածանոթ հյուրեր: Մասնավորապես, երեք օրերի ընթացքում ներկայացվեց, թե որքանով են Հայաստանում խախտվում աշխատանքային իրավունքները և ինչ է պետք անել նման խնդիրներից խուսափելու համար, ինչ գիտելիքներ են պետք աշխատողին սեփական սոցիալական երաշխիքների բավարարման համար, որոնք են աշխատավայրում առողջ և անվտանգ պայմանների պահպանման գործում մեր երկրում առկա առանցքային խնդիրները և այլ արդիական թեմաներ:
Միջոցառմանը մասնակցել են ավելի քան 130 արհմիութենականներ։ Առաջին տեղը գրավվածների մեդալների հաշվարկով արհմիութենական գավաթը իրենց հետ տարան առաջին տեղը գրաված Բուհերի ճյուղային հանրապետական միության ներկայացուցիչները։
Պարգևատրման արարողությանը ներկա էին Շախմատի ակադեմիայի հիմնադիր նախագահ Սմբատ Լպուտյանը, սեղանի թենիսի ֆեդերացիայի նախագահ Ֆելիքս Սարգսյանը, բազկամարտի ֆեդերացիայի նախագահ Արսեն Գաբրիելյանը, մարզական մեկնաբան Ռուդիկ Բարսեղյանը:
