Հունիսի 24-26-ը Ծաղկաձորում ՀԱՄԿ-ի և Solidarity Center-ի հայաստանյան գրասենյակի համագործակցությամբ տեղի ունեցավ սեմինար Առեվտրի եվ հասարակական սննդի, սպառկոոպերացիայի եվ ձեռներեցության աշխատողների արհեստակցական կազմակերպությունների ճյուղային հանրապետական միության արհմիութենականների համար։
Եռօրյա սեմինարը հագեցած էր ինտերակտիվ խմբային քննարկումներով և դերախաղերով։ Մասնակիցները տեղեկացան Հայաստանում արհմիության գործառույթների և իրավունքների մասին։ ՀԱՄԿ կազմակերպաուսումնական կենտրոնի ղեկավար Էլեն Մանասերյանը ներկայացրեց կոլեկտիվ պայմանագիրը, կոլեկտիվ բանակցությունները, ՀՀ աշխատանքային օրենսգրքի առանձնահատկությունները, ինչպես նաև առաջիկայում սպասվող փոփոխությունները։
Արհմիութենականները կատարեցին խմբային աշխատանք՝ առանձնացնելով արհմիությունների գլխավոր գործառույթները, ինչպես նաև փոխանակվեցին կարծիքներով արհմիութենական առաջնորդին բնորոշ հատկանիշների մասին։ Դերախաղերի միջոցով ներկաները մոդելավորեցին գործատուի կողմից աշխատողի իրավունքների ոտնահարման դեպքում արհմիության հնարավոր գործողությունները։
Սեմինարի գլխավոր նպատակն էր բարձրացնել արհմիութենականների իրավագիտակցությունը և խթանել փոխգործակցությունը։
«Համոզված եմ, որ մենք այստեղից հարստացած ենք գնում», - ընդգծեց Առեվտրի եվ հասարակական սննդի, սպառկոոպերացիայի եվ ձեռներեցության աշխատողների արհեստակցական կազմակերպությունների ճյուղային հանրապետական միության նախագահ Շմավոն Մկրտչյանը։
