Բռնությունն ու ոտնձգությունն աշխատանքի աշխարհում տարածված և վնասակար երևույթներ են, որոնք հանգեցնում են մի շարք լրջագույն հետևանքների՝ սկսած ֆիզիկական ու հոգեկան առողջության ծանր խնդիրներից մինչև ձախողված կարիերա։

Այս խնդրի առնչությամբ 2019թ-ի հունիսին Աշխատանքի միջազգային կազմակերպությունը (ԱՄԿ) ընդունել է Բռնության և ոտնձգությունների մասին կոնվենցիան (թիվ 190) և դրան կից Հանձնարարականը (թիվ 206): Այս փաստաթղթում ամրագրված է յուրաքանչյուր անձի՝ բռնությունից և ոտնձգություններից զերծ աշխատանքային պայմանների իրավունքը։

Աշխատավայրում բռնությունն ու ոտնձգությունները ոչ միայն վտանգում են աշխատողների ֆիզիկական և հոգեկան բարօրությունը, այլև խաթարում են աշխատանքում արժանապատվության, հարգանքի և հավասարության հիմնարար սկզբունքները։

Արհմիության ներկայացուցիչները  կարևոր դեր են խաղում աշխատավայրերում այս վնասակար երևույթները վերհանելու և վերջնականապես վերացնելու հարցում։