Հայաստանի արհմիությունների կոնֆեդերացիայի (ՀԱՄԿ) նախագահ՝ Էլեն Մանասերյանի հրավերով սույն թվականի ապրիլի 18-ից -20-ը Հայաստան էին այցելել Աշխատանքի միջազգային կազմակերպության (ԱՄԿ) աշխատողների հարցերով բյուրոյի տնօրեն Մարիա-Հելենա Անդրեն և ԱՄԿ Եվրոպայի և Կենտրոնական Ասիայի հարցերով բաժնի ղեկավար Սերգեյուս Գլովացկասը:
Հյուրերը նախ հանդիպում ունեցան ՀԱՄԿ-ի անդամ Ճյուղային Հանրապետական միությունների նախագահների հետ, որտեղ կարևոր շեշտադրումներ արվեցին առկա խնդիրների, ԱՄԿ կոնվենցիաների իրականացման և անռողջ ու անվտանգ աշխատանքային պայմաններին վերաբերող կոնվենցիաների վավերացման անհրաժեշտության վերաբերյալ։ ՀԱՄԿ-ի անդամ ՃՀՄ-ների կողմից բարձրացվեց նաև ՀՀ սահմանամերձ տարածքներում աշխատողների աշխատանքային, ինչպես նաև ապրելու իրավունքի խախտման դեպքերի մասին՝ հաշվի առնելով ՀՀ սուվերեն տարածքում ադրբեջանական զինված ուժերի ագրեսիվ գործողությունները։
Տիկին Մարիա-Հելենա Անդրեն և Սերգեյուս Գլովացկասը ՀԱՄԿ-ի նախագահ Էլեն Մանասերյանի հետ միասին հանդիպումներ ունեցան ՀՀ փոխվարչապետ՝ Տիգրան Խաչատրյանի և Աշխատանքի և սոցիալական հարցերի նախարարի տեղակալ՝ Ռուբեն Սարգսյանի հետ։
Փոխվարչապետ Խաչատրյանի հետ հանդիպման ընթացքում քննարկվեցին աշխատանքի և զբաղվածության ոլորտում փոխադարձ հետաքրքրություն ներկայացնող մի շարք հարցեր, այդ թվում՝ անդրադարձ կատարվեց աշխատանքային օրենսդրության իրավակարգավորումներին, գործատուների և աշխատողների աշխատանքային իրավունքների և շահերի պաշտպանության հարցերին:
Որպես սոցիալական գործընկերության շրջանակներում համագործակցության հիմնական նպատակ՝ կողմերն ընդգծեցին Հայաստանում սոցիալ-աշխատանքային ևդրա հետ կապված սոցիալ-տնտեսական հարաբերությունների զարգացումը։
ՀԱՄԿ-ի նախագահ Էլեն Մանասերյանը հանդիպումների ընթացքում ընդգծեց Հայաստանի Հանրապետությունում սոցիալական գործընկերության ինստիտուտի կայացման գործում Կառավարության դերակատարության անհրաժեշտությունը, ինչպես նաև նշեց առկա խնդիրներն ու մարտահրավերները։
ՀՀ Աշխատանքի և սոցիալական հարցերի նախարարությունում կողմերը քննարկում ունեցան ԱՄԿ հետ համագործակցության ընթացքի ու նախատեսվող ծրագրերի, ինչպես նաև Հայաստանում սոցիալական գործընկերության և երկխոսության զարգացմանն ուղղված աշխատանքների վերաբերյալ։ Կողմերն անդրադարձան նաև Արցախում ստեղծված իրավիճակին, ու ԱՄԿ լիազորությունների շրջանակում առկա խնդիրները դիտարկեու հնարավորությանը։
