2026թ․ հունվարի 23-ին, ստորագրվեց Հանրապետական կոլեկտիվ պայմանագիրը՝ Հայաստանի Հանրապետության կառավարության՝ ում անունից հանդես էր գալիս Հայաստանի Հանրապետության աշխատանքի և սոցիալական հարցերի նախարարը, Հայաստանի արհմիությունների կոնֆեդերացիայի և Հայաստանի գործատուների հանրապետական միության միջև։
Պայմանագրով սահմանվում են սոցիալ-աշխատանքային և դրա հետ կապված սոցիալ-տնտեսական լրացուցիչ երաշխիքներ և Կողմերի համատեղ գործողությունները դրանց իրականացման համար: Կողմերը համագործակցության հիմնական նպատակն են համարում Հայաստանի Հանրապետությունում սոցիալ-աշխատանքային և դրա հետ կապված սոցիալ-տնտեսական հարաբերությունների զարգացումը, որը պետք է հիմնված լինի սոցիալական արդարության սկզբունքի վրա և ուղեկցվի մարդկային կապիտալի զարգացմամբ, զբաղվածության մակարդակի բարձրացմամբ, աղքատության կրճատմամբ, աշխատանքային իրավունքների պաշտպանությամբ և արժանապատիվ աշխատանքի ամրապնդմամբ:
Ողջույնի խոսքով հանդես եկան Հայաստանի Հանրապետության աշխատանքի և սոցիալական հարցերի նախարար Արսեն Թորոսյանը, Հայաստանի արհմիությունների կոնֆեդերացիայի նախագահ Էլեն Մանասերյանը, Հայաստանի Գործատուների Հանրապետական միության նախագահ Վահագն Համբարձումյանը, ԱՄԿ բարձրաստիճան ներկայացուցիչներ` Էմանուել Ժուլիենը, Սերգեյուս Գլովացկասը, Հենրիկ Մյոլլերը։
Իր ելույթում ՀԱՄԿ նախագահ Էլեն Մանասերյանը նշեց, որ Պայմանագրի կնքումը հաստատում է պետության, արհմիությունների և գործատուների պատրաստակամությունը սոցիալական արդարության և արժանապատիվ աշխատանքի հասնելու համար։
Էլեն Մանասերյանն ընդգծեց, որ Պայմանագրի յուրաքանչյուր բաժին երկար քննարկումների և բանակցությունների արդյունքում ստացված համաձայնություն է, քանի որ բոլոր կողմերի նպատակը կայուն, զարգացած և արժանապատիվ աշխատանքային պայմաններ ապահովող Հայաստանի Հանրապետություն ունենալն է։
Հայաստանի Հանրապետության աշխատանքի և սոցիալական հարցերի նախարար Արսեն Թորոսյանը իր ելույթում նշեց, որ փաստաթղթի ստորագրումը ևս մեկ կարևոր քայլ է սոցիալական գործընկերների հետ համակարգված ու փոխշահավետ համագործակցության ամրապնդման ուղղությամբ, որի առանցքային նպատակն աշխատողների և գործատուների շահերի հավասարակշռված պաշտպանության ապահովումն ու արդյունավետ երկխոսության կառուցումն է։
Հայաստանի գործատուների հանրապետական միության նախագահ Վահագն Համբարձումյանն արձանագրեց, որ պայմանագրի կողմ է հանդիսանում ՀՀ կառավարությունը՝ իր ողջ կազմով և լիազորություններով, ինչը լուրջ երաշխիք է գործատուների համար, որ բարձրացրած հարցերը կստանան համակարգային լուծումներ կառավարության բոլոր մակարդակներում։
Մեդիայի անդրադարձը՝
https://www.youtube.com/watch?v=MWj6ddFF2sI
https://www.youtube.com/watch?v=Dm9-mGYU3lA
