Մայիսի 7-9-ը Ծաղկաձորում տեղի ունեցավ ՀԱՄԿ-ի և Solidarity Center-ի Հայաստանյան գրասենյակի համատեղ սեմինարը Թեթև արդյունաբերության աշխատողների արհեստակցական կազմակերպությունների ճյուղային հանրապետական միության արհմիութենականների համար։
Ի՞նչ կառույց է արհմիությունը, ի՞նչ իրավունքներ ու գործառույթներ ունի այն Հայաստանում և ի՞նչ արդիական խնդիրներ է դնում իր առաջ․ եռօրյա սեմինարը հագեցած էր այս թեմաների վերաբերյալ օգտակար տեղեկություններով, խմբակային աշխատանքներով և քննարկումներով։ ՀԱՄԿ-ի ուսումնակազմակերպչական կենտրոնի ղեկավար Էլեն Մանասերյանը ներկայացրեց ՀՀ աշխատանքային օրենսգրքի հիմնական դրույթները, կոլեկտիվ պայմանագիրը, արհմիութենական սկզբնական կառույցներ-ՃՀՄ-ՀԱՄԿ եռաստիճան համակարգի առանձնահատկությունները։
Հետաքրքիր քննարկում ծավալվեց արհմիութենական առաջնորդության վերաբերյալ, որի ընթացքում մասնակիցները կիսվեցին իրենց պատկերացումներով այն մասին, թե ինչ որակներ պիտի ունենա արհմիութենական առաջնորդը։ Ակտիվ ներգրավվեցին նաև պրակտիկ խմբային առաջադրանքների, իրավագիտակցությունն ու փոխգործակցությունը խթանող դերային խաղերի մեջ։
«Կարևոր է իմաստավարել արհմիությունների դերը ժամանակակից աշխարհի մարտահրավերներին համապատասխան և անկյունաքարային դարձնել աշխատանքային իրավունքի պաշտպանությունը»,- նշեց Էլեն Մանասերյանը։
