Հայաստանի արհմիությունների կոնֆեդերացիայի նախագահ Էլեն Մանասերյանը, ՀԱՄԿ-ի հավասարության հարցերով մշտական գործող հանձնաժողովի նախագահ Լիանա Ամիրաղյանը Համերաշխության կենտրոնի գրասենյակի ներկայացուցիչներ հետ 2023թ․ հոկտեմբերի 14-29-ը պաշտոնական այցով գտնվում էին Ամերիկայի Միացյալ Նահանգներում, որը կազմակերպվել էր Համերաշխության կենտրոնի գործընկերների աջակցությամբ։
 Այցը ճանաչողական էր, որի ընթացքում հայաստանյան պատվիրակության ներկայացուցիչները հնարավորություն ունեցան ծանոթանալ Սան Ֆրացիսկոյում ուսուցիչների ճյուղային միության և Լոս Անջելոսում Unite Here Local 11 սպասարկման ոլորտի միության արհմիությունների աշխատանքներին, հատկապես բանակցություններ վարելու և  գորրծադուլներ կազմակերպելու ու անցկացնելու գործընթացներին։ Հանդիպումներ ունեցան նաև ազգությամբ հայ ահմիութենականների հետ, քննարկվեցին փոխայցերի հնարավորություններ, համագործակցության հիմնաքարեր դրվեցին նաև ՀԱՄԿ-ի անդամ ճյուղային միությունների համար։
 Հայաստանյան պատվիրակությունը այցելեց Մոնտեբելոյում Հայոց ցեղասպանության զոհերի հիշատակը հավերժացնող հուշահամալիր, որտեղ հագեցած հանդիպում ունեցավ Մոնտեբելոյի նախկին և ներկա ղեկավարների հետ, հյուրընկալվեց նաև Գլենդելի և Լոս Անջելոսի քաղաքային խորհուրդներում։ Հանդիպումներ ունեցավ նաև քաղաքային խորհուրդների անդամների հետ։ ՀԱՄԿ-ի նախագահը Լոս Անջելոսի քաղաքային խորհրդի անդամ Հյուգո Սոտո-Մարտինեզի ներկայացմամբ ելույթ ունեցավ քաղաքային խորհրդում, որտեղ հակիրճ ներկայացրեց ՀԱՄԿ-ի գործունեությունը, Հայաստանի Հանրապետության ներկա իրավիճակը, արհմիությունների մարտահրավերները, Արցախից բռնի տեղահանված հայրենակիցների խնդիրները։
Լոս Անջելոսի քաղաքային խորհուրդը, ի նշան համագործակցության ճանաչման, ՀԱՄԿ-ին շնորհեց պատվոգիր։