Սիրելի աշխատողներ, արհմիութենականներ, գործընկերներ,
ջերմորեն շնորհավորում եմ Մայիսի 1-ի՝ Աշխատավորների միջազգային համերաշխության օրվա կապակցությամբ։
Այս օրը խորհրդանշում է աշխատավոր մարդու արժանապատվությունը, համերաշխությունը, իրավունքների պաշտպանության համար մղված պայքարը և սոցիալական արդարության ձգտումը։ Մայիսի 1-ը հիշեցնում է մեզ, որ հասարակության և պետության զարգացման հիմքում կանգնած է մարդը՝ իր աշխատանքով, գիտելիքով, փորձով ու նվիրումով։
Այսօր մենք երախտագիտությամբ շնորհակալություն ենք հայտնում մեր երկրի բոլոր աշխատողներին՝ բժիշկներին, ուսուցիչներին, արդյունաբերության, գյուղատնտեսության, ծառայությունների, տրանսպորտի, տեղեկատվական տեխնոլոգիաների և բազմաթիվ այլ ոլորտների ներկայացուցիչներին, որոնց ամենօրյա աշխատանքը շարժում է մեր տնտեսությունը և ապահովում հասարակական կյանքի բնականոն ընթացքը։
Միևնույն ժամանակ, այս օրը նաև առիթ է ևս մեկ անգամ բարձրաձայնելու այն խնդիրների մասին, որոնց առջև կանգնած են աշխատողները Հայաստանում։ Արժանապատիվ աշխատանքի, արդար վարձատրության, անվտանգ աշխատանքային պայմանների, սոցիալական պաշտպանության և աշխատանքային իրավունքների լիարժեք իրացման հարցերը շարունակում են մնալ մեր օրակարգի առաջնագծում։
Մենք համոզված ենք, որ ուժեղ պետություն հնարավոր է միայն այն դեպքում, երբ գնահատված և պաշտպանված է աշխատող մարդը։ Տնտեսական զարգացումը պետք է արտահայտվի ոչ միայն թվերով, այլ մարդկանց կյանքի որակի բարձրացմամբ, կայուն զբաղվածությամբ և վստահությամբ վաղվա օրվա նկատմամբ։
Հայաստանի արհմիությունների կոնֆեդերացիան շարունակելու է հետևողականորեն պաշտպանել աշխատողների իրավունքները, զարգացնել սոցիալական երկխոսությունը և նպաստել այնպիսի միջավայրի ձևավորմանը, որտեղ յուրաքանչյուր քաղաքացի կունենա արժանապատիվ աշխատանքի հնարավորություն։
Մաղթում եմ ձեզ խաղաղություն, առողջություն, բարեկեցություն և աշխատանքային նոր հաջողություններ։
Շնորհավոր Մայիսի 1-ը։