Հայաստանի արհմիությունների կոնֆեդերացիայի (ՀԱՄԿ) խորհրդի անդամները հանդիպում են ունեցել Աշխատանքի և սոցիալական հարցերի նախարար Արսեն Թորոսյանի հետ՝ բարձրացնելու և քննարկելու աշխատողների իրավունքների պաշտպանությանն առնչվող առաջնահերթ հարցերը։
Հանդիպման ընթացքում ՀԱՄԿ ներկայացուցիչները ներկայացրել են աշխատանքի ոլորտում առկա հիմնախնդիրները՝ առանձնահատուկ ուշադրություն դարձնելով աշխատողների իրավունքների խախտումների դեպքերին, աշխատանքի անվտանգության անբավարար պայմաններին, ինչպես նաև կոլեկտիվ պայմանագրերի կիրառման սահմանափակ պրակտիկային։ Ընդգծվել է, որ աշխատողների շահերի արդյունավետ պաշտպանությունը հնարավոր է միայն ուժեղ և անկախ արհմիությունների գործուն մասնակցության պայմաններում։
Հայաստանի արհմիությունների կոնֆեդերացիայի խորհրդի անդամները կարևորել են սոցիալական երկխոսության ինստիտուտի զարգացումը և նշել, որ պետություն–արհմիություն–գործատու եռակողմ համագործակցությունը պետք է ունենա գործնական և ոչ ձևական բնույթ։ Նշվել է նաև, որ անհրաժեշտ է ապահովել արհմիությունների լիարժեք ներգրավվածությունը աշխատանքի և սոցիալական քաղաքականությունների մշակման և իրականացման գործընթացներում։
ՀԱՄԿ ներկայացուցիչները բարձրացրել են նաև աշխատանքի օրենսդրության կիրառման խնդիրները՝ շեշտելով վերահսկողական մեխանիզմների ուժեղացման, աշխատողների իրավունքների պաշտպանության արդյունավետ գործիքների ներդրման և աշխատանքի տեսչական համակարգի դերակատարության բարձրացման անհրաժեշտությունը։
Իր հերթին, Աշխատանքի և սոցիալական հարցերի նախարար Արսեն Թորոսյանը ներկայացրել է ոլորտում իրականացվող բարեփոխումները և նախարարության մոտեցումները՝ ուղղված սոցիալական պաշտպանության համակարգի զարգացմանը և զբաղվածության խթանմանը։ Նա ընդգծել է արհմիությունների հետ համագործակցության կարևորությունը և պատրաստակամություն հայտնել շարունակելու կառուցողական երկխոսությունը։
Հանդիպման ավարտին կողմերը վերահաստատել են համագործակցության խորացման պատրաստակամությունը՝ կարևորելով աշխատողների իրավունքների պաշտպանության ամրապնդումը, արժանապատիվ աշխատանքի պայմանների ապահովումը և սոցիալական արդարության խթանումը։
