Հարգելի աշխատավորներ

  Շնորհավորում եմ բոլորիս Աշխատանքի օրվա և Աշխատավորների համերաշխության միջազգային օրվա առթիվ։
  Այս օրը արհմիություններն արտահայտում են իրենց համերաշխությունն ու միասնականությունը սոցիալական արդարության և արժանապատիվ աշխատանքի սկզբունքների իրականացման համար: Ամբողջ աշխարհում աշխատողների առջև ծառացած մարտահրավերները պահանջում են հավաքական ջանքեր՝ պայքարելու ժողովրդավարական իրավունքների, ազատությունների և հավասարության համար:
  COVID-19 համավարակն ու աշխարհում տիրող քաղաքական անկայուն վիճակը բացասաբար է անդրադառնում բոլոր երկրների տնտեսությունների և ֆինանսական շուկայի վրա։ Դրանց հետևանքներն իրենց զգացնել կտան տարիներ շարունակ, մինչդեռ տնտեսական հետևանքների ծանրությունն ընկնում է աշխատավորների ուսերին։
  Այս իրավիճակը չի շրջանցել նաև Հայաստանի Հանրապետությունը, որտեղ նույնպես առկա են աշխատողների եկամուտների և սոցիալ-տնտեսական մակարդակի նվազում, ինչի արդյունքում խորացել է աղքատությունն ու գործազրկությունը:
  Ծագած խնդիրները լուծելու համար պահանջվելու է ոչ միայն պատասխանատու մոտեցում, այլև գործողությունների համակողմանի համակարգում։ Դրական արդյունքների կարելի է հասնել միայն այն դեպքում, եթե կառավարությունները և գործատուները աշխատեն արհմիությունների հետ միասին:
  ՀԱՄԿ-ը գտնում է, որ աշխատավորների շահերը պետք է առաջնային լինեն, և որևէ դժվարություն կամ խնդիր չի կարող պատրվակ հանդիսանալ աշխատողների իրավունքների ոտնահարման համար՝ անտեսելով արժանապատիվ աշխատանքի սկզբունքները։
  Աշխատանքի օրվա առթիվ ՀԱՄԿ-ը կրկին շնորհավորում է արհմիության անդամներին, բոլոր աշխատողներին, մաղթում արժանապատիվ աշխատանք, Հայաստանի շենացման վերընթաց ուղին կերտելու հաստատակամություն, ուժ ու եռանդ:

ՀԱՅԱՍՏԱՆԻ ԱՐՀՄԻՈՒԹՅՈՒՆՆԵՐԻ 
ԿՈՆՖԵԴԵՐԱՑԻԱՅԻ       ՆԱԽԱԳԱՀ                               ԷԴՈՒԱՐԴ  ԹՈՒՄԱՍՅԱՆ