Հայաստանի արհմիությունների կոնֆեդերացիայի (ՀԱՄԿ) ղեկավարությունը, ՀԱՄԿ-ի անդամ ճյուղային հանրապետական միությունները և ՀԱՄԿ-ի մշտական գործող հանձնաժողովների ներկայացուցիչները սույն թվականի ապրիլի 18-ին հյուրընկալեցին Աշխատանքի միջազգային կազմակերպության (ԱՄԿ) աշխատողների հարցերով բյուրոյի տնօրեն Մարիա Հելենա Անդրեին և ԱՄԿ Եվրոպայի և Կենտրոնական Ասիայի հարցերով բաժնի ղեկավար Սերգեյուս Գլովացկասին:
ՀԱՄԿ-ի նախագահ Էլեն Մանասերյանը, ողջունելով մասնակիցներին, նշեց, որ ԱՄԿ աշխատողների հարցերով բյուրոյի տնօրեն Մարիա Հելենա Անդրեի այցելությունը Հայաստան համարվում է պատմական այց, քանի որ ԱՄԿ-ի առաջին բարձրաստիճան պաշտոնյայի այցն է Հայաստանի Հանրապետություն:
Մասնակիցները քննարկեցին սոցիալական գործընկերության ներկա իրավիճակը և խնդիրները, ինչպես նաև առողջ և անվտանգ աշխատանքային պայմաններին վերաբերող ԱՄԿ թիվ 155, 187 հիմնարար կոնվենցիաների Հայաստանի Հարապետության կողմից վավերացնելու և վավերացված կոնվենցիաների կիրարկման, երիտասարդ աշխատողներին արհմիություններում ներգրավելու և նրանց գործունեության արդյունավետությունը բարձրացնելու հետ կապված հարցեր:
ԱՄԿ Եվրոպայի և Կենտրոնական Ասիայի հարցերով բաժնի ղեկավար Սերգեյուս Գլովացկասը ընդգծեց, որ ԱՄԿ կոնվենցիաների վավերացումը պետությունների կողմից համարվում է առաջին քայլ, որին պետք է հաջորդի դրանց լիարժեք կիրարկումը:
ՀԱՄԿ-ի անդամ ճյուղային հանրապետական միությունների նախագահները նշեցին, որ Հայաստանի Հանրապետության սահմանամերձ համայնքներում խախտվում են աշխատողների հիմնարար իրավունքները, այդ թվում՝ կյանքի իրավունքը, քանի որ ադրբեջանական ագրեսիայի և շարունակական ռազմական միջադեպերը խաթարում են հատկապես գյուղատնտեսության և հանքագործության ոլորտի աշխատողների անվտանգությունը:
Մասնակիցները քննարկեցին նաև ԱՄԿ-ի հետ հետագա համագործակցության ուղղություններն ու հնարավորությունները:
Ամփոփելով՝ Մարիա Հելենա Անդրեն նշեց, որ այս այցի շրջանակներում հանդիպումներ պետք է ունենա ՀՀ կառավարության և ՀՀ Ազգային Ժողովի ներկայացուցիչների հետ, որտեղ կներկայացնի մասնակիցների կողմից բարձրացված հարցերը:
