Հայաստանի արհմիությունների կոնֆեդերացիան մայիսի 21-ին հյուրընկալել էր Վրաստանի արհմիությունների կոնֆեդերացիայի պատվիրակությանը՝  կոնֆեդերացիայի նախագահ Իրակլի Պետրիաշվիլիի գլխավորությամբ:

Հանդիպմանը հիմնական քննարկվող թեման աշխատավայրում առկա գենդերային անհավասարության բացառմանն  ուղղված քայլերի ներկայացումն էր: Երկու պետությունների արհմիությունների նախագահները խոսեցին երկրներում առկա խնդիրներից,  իրենց կատարված աշխատանքներից և հույս հայտնեցին, որ մոտ ապագայում կունենան զգալի արդյունք աշխատավայրում սեռով պայմանավորված խտրականության վերացման հարցում:

Ողջունելով հյուրերին՝ Հայաստանի արհմիությունների կոնֆեդերացիայի նախագահ Էլեն Մանասերյանը կարևորեց հարևան պետությունների միջև արհմիութենական կապերի ամրապնդումը և արժևորեց նման քննարկումները, քանի որ փորձի նման փոխանակումները համանաման խնդիրների լուծման համար ստեղծում են նոր հնարավորություններ: