Հայաստանի արհմիությունների կոնֆեդերացիան «Սոլիդարիթի Սենթեր» կազմակերպության հայաստանյան գրասենյակի հետ համատեղ Աշխատանքի օրվա կապակցությամբ 2023 թվականի մայիսի 1-ին կազմակերպել էին «Միասին ուժեղ ենք» խորագրով բացօթյա հանրային միջոցառում և պանելային քննարկում:
Բացօթյա հանրային միջոցառման նպատակն էր հանրության շրջանում արհմիությունների գործունեության և աշխատանքային իրավունքների վերաբերյալ իրազեկումը: Միջոցառման ընթացքում քաղաքացիներին տրամադրվեց աշխատանքային իրավահարաբերություններին վերաբերող իրավախորհրդատվություն:
Պանելային քննարկումը սկսվեց «Մայիսի 1՝ Աշխատանքի միջազգային օր» լուսանկարների ցուցահանդեսով:
Քննարկման բանախոսներն էին Հայաստանի արհմիությունների կոնֆեդերացիայի նախագահ Էլեն Մանասերյանը, Հայաստանի Հանրապետության աշխատանքի և սոցիալական հարցերի նախարարի տեղակալ Ռուբեն Սարգսյանը, Հայաստանի Հանրապետության առողջապահական և աշխատանքի տեսչական մարմնի ղեկավարի պարտականությունները կատարող Սլավիկ Սարգսյանը:
Բանախոսները ներկայացրեցին աշխատանքային իրավահարաբերություններում առկա իրավիճակը, իրավակիրառ պրակտիկայում հանդիպող խնդիրները։ Կարևորեցին աշխատանքային և սոցիալական իրավունքների իրացման ճանապարհին սոցիալական գործընկերության դերը և Հայաստանի Հանրապետությունում յուրաքանչյուր աշխատողի համար արժանապատիվ աշխատանքի ապահովումը:
