Աշխատանքի միջազգային կազմակերպության (ԱՄԿ) Աշխատանքի միջազգային համաժողովի 114-րդ նստաշրջանի շրջանակներում Հայաստանի արհմիությունների կոնֆեդերացիայի պատվիրակությունը մի շարք կարևոր հանդիպումներ է ունեցել ԱՄԿ բարձրաստիճան պաշտոնյաների հետ։
Մասնավորապես, հանդիպումներ են կայացել ԱՄԿ գլխավոր տնօրենի գրասենյակի տնօրեն և տարածաշրջանների հարցերով գլխավոր տնօրենի օգնական Բեատե Անդրեասի, Եվրոպայի և Կենտրոնական Ասիայի տարածաշրջանային տնօրեն Պիտեր վան Ռոոյիի, Աշխատողների գործունեության բյուրոյի (ACTRAV) տնօրեն Օլիվեր Ռյոպկեի, ինչպես նաև Աշխատողների գործունեության բյուրոյի (ACTRAV) Կենտրոնական և Արևելյան Եվրոպայի հարցերով պատասխանատու Սերգեյուս Գլովացկասի հետ։
Հայաստանի արհմիությունների կոնֆեդերացիայի նախագահ Էլեն Մանասերյանն ԱՄԿ Եվրոպայի և Կենտրոնական Ասիայի տարածաշրջանային տնօրեն Պիտեր վան Ռոոյիի և Աշխատողների գործունեության բյուրոյի տնօրեն Օլիվեր Ռյոպկեի հետ հանդիպման ընթացքում ներկայացրել է Հայաստանում արհմիությունների առջև ծառացած մարտահրավերներն ու առաջնահերթությունները։ Քննարկման ընթացքում ուրվագծվել են Հայաստանի արհմիությունների կոնֆեդերացիայի և ԱՄԿ-ի միջև հետագա համագործակցության ուղղությունները։
Հանդիպումների ընթացքում քննարկվել են նաև Հայաստանի աշխատաշուկայի զարգացման արդի մարտահրավերները, սոցիալական գործընկերության նշանակությունը տնտեսական զարգացման գործընթացներում, ինչպես նաև տարածաշրջանում իրականացվող ԱՄԿ ծրագրերն ու եռակողմ գործընկերների ներգրավվածության ընդլայնման հեռանկարները։ Առանձնահատուկ ուշադրություն է դարձվել սոցիալական երկխոսության ամրապնդման հնարավորություններին և ԱՄԿ-ի հետ համագործակցության հետագա ուղղություններին։
Հանդիպումները վերահաստատեցին ԱՄԿ-ի և Հայաստանի սոցիալական գործընկերների միջև արդյունավետ համագործակցության կարևորությունը՝ նպաստելով արժանապատիվ աշխատանքի, սոցիալական արդարության և կայուն տնտեսական զարգացման օրակարգի առաջմղմանը։
