2026 թվականի հունվարի մեկից գործարկվել է աշխատանքային պայմանագրերի կնքման Էլեկտրոնային թվային համակարգը, որից աշխատողները կարող են օգտվել «Ֆիզիկական անձանց էլեկտրոնային ծառայությունների միասնական համակարգի» միջոցով՝ մուտք գործելով նոր ստեղծված «Աշխատանքային պայմանագրեր» բաժինը։ Հարթակից օգվելու համար անհրաժեշտ է ունենալ էլեկտրոնային ստորագրություն, որով էլ հնարավոր կլինի մուտք գործել համակարգ, դիտել իրենց հետ կնքված պայմանագրերը, աշխատանքի ընդունման և աշխատանքային պայմանագիրը լուծելու հրամաններն ու աշխատանքային համաձայնագրերը, էլեկտրոնային եղանակով ստորագրել այդ փաստաթղթերը և ստանալ ծանուցումներ։
Նոր ընդունվող աշխատողների հետ աշխատանքային պայմանագրերի կնքումն էլեկտրոնային եղանակով պարտադիր է։ Այն աշխատողների պայմանագրերը, որոնք դեռևս թվային չեն, գործատուները 2026 թվականի հունվարի 1-ից պարտավոր են  տասներկուամսյա ժամկետում դրանք մուտքագրել համակարգ, իսկ աշխատողները պետք է էլեկտրոնային ստորագրությամբ հաստատեն թվային պայմանագիրը։
Համակարգի գործարկման հետ կապված արհմիության անդամների կողմից առավել բարձրացվում են հետևյալ հարցերը․ 

- էլեկտրոնային ստորագրության համար անհրաժեշտ է ունենալ նույնականացման քարտ և փոխել հեռախոսահամարի քարտը, ինչը հանգեցրել է հերթերի առաջացմանը և աշխատողներից շատերը չեն հասցրել ձեռք բերել դրանք։ Որոշ գործատուներ սպառնում են աշխատողներին, ասելով, որ եթե չունեն էլեկտրոնային ստորագրություն, պետք է ազատվեն աշխատանքից։
Անհրաժեշտ է իմանալ, որ էլեկտրոնային ստորագրություն չունենալը, հիմք չէ աշխատանքից ազատելու համար։ Գործատուի նախաձեռնությամբ աշխատանքային պայմանագիրը լուծելու հիմքերը սահմանաված են ՀՀ աշխատանքային օրենսգրքի 113-րդ հոդվածով։ 
- Աշխատողները հարցնում են՝ ո՞վ է կրում աշխատանքային պայմանագիրը Թվային համակարգում վերբեռնելու պարտավորությունը։ Կազմակերպությունում արդեն աշխատող անձանց պայմանագրերը Թվային համակարգ վերբեռնելու պարտավորությունը կրում է գործատուն։ Սակայն, հաշվի առեք, որ եթե աշխատանքային գործունեության ընթացքում պայմանագիրը մեկ կամ մի քանի անգամ փոփոխվել է համաձայնագրերով, գործատուն Թվային համակարգում տեղադրելու է մեկ պայմանագիր՝ վերջին համաձայնագրով փոփոխված տարբերակով։ Ուշադիր կարդացեք պայմանագիրը, համեմատեք արդյո՞ք ներառված են  թղթային տարբերակի բոլոր դրույթները, ներառյալ՝ համաձայնագրերով փոփոխվածը։ Թվային պայմանագիրը ստորագրելուց հետ, հաջորդիվ բոլոր փոփոխությունները կատարվելու են Թվային համակարգում։ Սակայն աշխատողը կարող է տպել համակարգից և պահել նաև թղթային տարբերակը։