Հունիսի 20-22-ը Ծաղկաձորում ՀԱՄԿ-ի և Solidarity Center-ի հայաստանյան գրասենյակի համատեղ ջանքերով տեղի ունեցավ կլոր սեղան ՀԱՄԿ-ի և արհեստակցական կազմակերպությունների ճյուղային հանրապետական միությունների մասնակցությամբ։
ՀԱՄԿ-ի կազմակերաուսումնական կենտրոնի ղեկավար Էլեն Մանասերյանը ներկայացրեց «Արհեստակցական միությունների գործունեության օրենսդրական դաշտը և միջազգային փորձը» ուսումնասիրությունը։ Այն ներառում էր համապարփակ հետազոտություն աշխարհում առկա արհմիութենական փորձի մասին, մասնավորապես՝ սկանդինավյան երկրների՝ Ֆինլանդիայի և Շվեդիայի, ինչպես նաև մերձբալթյան երկրների՝ Լատվիայի և Լիտվայի արհմիություններին վերաբերող օրենսդրական դաշտի առանձնահատկություններն ու արհմիությունների գործունեության լավագույն պրակտիկան։
ՀԱՄԿ-ի իրավաբանական բաժնի իրավախորհրդատու Աննա Բարիկյանը ներկայացրեց նաև Ֆրանսիայի փորձը՝ առանձնացնելով առավելապես հայաստանյան իրականության համատեքստում ուշադրության արժանի կետերը։
Հետազոտության ներկայացումից հետո ներկաները փոխանակվեցին կարծիքներով կարևոր հարցերի շուրջ, հարց-պատասխանի միջոցով վեր հանեցին արհմիությունների գործունեությանը վերաբերող հիմնաքարային խնդիրներ, ինչպես նաև քննարկեցին միջազգային փորձի՝ Հայաստանի համար կիրառելի դրույթների առանձնահատկությունները։
Առարկայական քննարկումը և ուսումնասիրության ներկայացումն ուղղված էին Հայաստանում արհմիությունների դերի և կարևորության բարձրացմանը, ինչպես նաև գործունեության արդյունավետության խթանմանը։
