Սոցիալական գործընկերության շրջանակում Հայաստանի արհմիությունների կոնֆեդերացիայի նախաձեռնությամբ և Աշխատանքի Միջազգային Կազմակերպության աջակցությամբ հուլիսի 7-ին տեղի է ունեցել Հայաստանի 2023-2030 թթ․ Զբաղվածության ռազմավարության վերաբերյալ աշխատանքային քննարկում, որին մասնակցում էին նաև Արհմիությունների Կոնֆեդերացիայի նախագահ` Էլեն Մանասերյանը, ԱՍՀ նախարարի տեղակալ Ռուբեն Սարգսյանը, ԱՄԿ Եվրոպայի և կենտրոնական Ասիայի հարցերով բաժնի ղեկավար Սերգեյուս Գլովացկասը, ՀԱՄԿ-ի նախագահի տեղակալները և Ճյուղային արհմիությունների նախագահներ։

Քննարկման ընթացքում ներկայացվել է Զբաղվածության ռազմավարության նպատակներն ու իրականացման գործողությունների միջոցառումները․ այն ՀՀ կառավարության գործունեության ծրագրից բխող ռազմավարական փաստաթղթերից մեկն է։
ՀԱՄԿ-ի նախագահ Էլեն Մանասերյանը իր խոսքում նշեց, որ ռազմավարության նախագծի քննարկումը այս ձևաչափով անհրաժեշտ է, կարևոր է լսել արհմիությունների տեսակետը և դիտարկումները, հաշվի առնելով, որ արհմիությունները ներկայացնում են աշխատաշուկայում  շահառուների մեծ բանակ և ամենամոտն են կանգնած աշխատողին։
ԱՍՀ նախարարի տեղակալ Ռուբեն Սարգսյանի խոսքով՝ զբաղվածության ռազմավարության մշակման ընթացքում իրականացվել են բազմաթիվ հետազոտություններ, ուսումնասիրվել է աշխատաշուկայի պահանջները, հաշվարկվել արդյունավետության չափանիշները։
Հանդիպումը շարունակվեց հարցուպատասխանի ձևաչափով, մասնակիցները ներկայացրել են իրենց առաջարկներն ու դիտարկումները։