2025թ.հոկտեմբերի 9-ին ՀԱՄԿ-ի միջոցառումների համար նախատեսված թիվ 808 դահլիճում տեղի ունեցավ հանդիսավոր ընդունելություն՝ նվիրված ‹‹Ուսուցչի օր›› և ‹‹Գրադարանավարի օր›› մասնագիտական տոներին: Միջոցառմանը մասնակցում էին 43 արհմիության անդամներ: Նրանցից 30-ը իրենց արհմիութենական կազմակերպությունների կողմից ներկայացված էին Հայաստանի մշակույթի աշխատողների արհեստակցական կազմակերպությունների Ճյուղային հանրապետական միության պատվոգրով պարգևատրման: Միջոցառման մասնակիցների թվում էին նաև ՃՀՄ-ի գործկոմի անդամներ, արհեստակցական կազմակերպությունների նախագահներ: Հրավիրվածների թվում էին ՀԱՄԿ-ի նախագահ Էլեն Մանասերյանը, ՈՒՀԿ–ի ղեկավար Վարդուհի Բրուտյանը, Գավառի տարածքի մշակույթի աշխատողների արհեստակցական կազմակերպության նորընտիր նախագահ Լուսինե Դեղոյանը, Գավառի Հայրապետ Խաչատրյանի /Կոլոտի/ անվան արվեստի դպրոցի երգեցողության դասատու Նարինե Գոզեյանը, 4-րդ և 6-րդ դասարանների աշակերտներ Դավիթ Դավթյանը և Լևինե Մկրտչյանը:
Բացման խոսքով հանդես եկավ ՃՀՄ-ի նախագահ Էսմա Սիմոնյանը: Նա ողջունեց ներկաներին տոների կապակցությամբ և անդրադարձավ հասարակության ուսուցման, դաստիարակության, արժեքային համակարգի ձևավորման գործում ուսուցիչների և գրադարանավարների կատարած անգնահատելի աշխատանքի նշանակությանն ու կարևորությանը: Նշեց, որ Հայաստանի մշակույթի աշխատողների Ճյուղային արհմիությունը արդեն ավանդույթ է դարձրել մշակույթի ոլորտի գրեթե բոլոր մասնագիտական տոներին (թատրոնի, թանգարանի, գրադարանավարի, ուսուցչի) նվիրված ամենամյա միջոցառումների կազմակերպումը՝ նպատակ ունենալով կարևորելու, արժևորելու և մեծարելու ոլորտի աշխատողներին և նրանց կատարած մեծ աշխատանքը:
ՃՀՄ-ի նախագահը թվով 30 գրադարանավարի և ուսուցչի պարգևատրեց Հայաստանի մշակույթի աշխատողների արհեստակցական կազմակերպությունների Ճյուղային Հանրապետական միության պատվոգրով և 15 հազարական դրամով:
Ներկաներին տոների կապակցությամբ շնորհավորեց և արհմիության խնդիրների մասին խոսեց ՀԱՄԿ-ի նախագահ Էլեն Մանասերյանը:
Ելույթ ունեցան ուսուցիչներին և գրադարանավարներին շնորհավորել եկած Գավառի Հայրապետ Խաչատրյանի (Կոլոտի) անվան արվեստի դպրոցի սաները. որոնք իրենց կատարումներով նոր շունչ հաղորդեցին տոնական տրամադրությանը: Այնուհետև մասնակիցները լուսանկարվեցին, և տոնական միջոցառումն ավարտվեց ֆուրշետի սեղանների շուրջ ջերմ և անկեղծ մթնոլորտում՝ հաջորդ տարի նորից հանդիպելու ակնկալիքով:
