Ս/թ ապրիլի 3-ին ՀԱՄԿ-ի շենքի 808-րդ դահլիճում տեղի ունեցավ Հայաստանի մշակույթի աշխատողների ճյուղային արհմիությանն անդամակցող թատրոնների աշխատողների հանդիսավոր ընդունելություն, որին մասնակցում էին Ճյուղային հանրապետական միության պատվոգրով պարգևատրվածները, գործկոմի անդամներ, թատրոնների արհկոմների նախագահներ և այլք:
Ողջունելով ներկաներին և շնորհավորելով մասնագիտական տոնի կապակցությամբ՝ ՃՀՄ-ի նախագահ Էսմա Սիմոնյանը թռուցիկ անդրադարձ կատարեց Թատրոնի միջազգային օրվա ստեղծման պատմությանը՝ կարևորելով թատերական արվեստի արարման, զարգացման և տարածման գործում նրա ունեցած դերն ու նշանակությունը:
Խոսելով հայ թատրոնի մասին՝ ՃՀՄ-ի նախագահը նշեց, որ այն եղել է համաշխարհային թատերական արվեստի մշտական ուղեկիցը դեռևս մեր թվարկությունից առաջ և շարունակում է լինել նաև այսօր: Հայ թատրոնն այսօր երկու հազար և ավելի տարեկան է, այն ունի հարուստ պատմություն, փառահեղ անցյալ և ներկա , հզոր ավանդույթներ, դեմքեր և դերակատարներ.. Մեր ժողովուրդը Թատրոնի միջազգային օրը նշում է ամեն տարի և հավուր պատշաճի: Դրա մասին է վկայում նաև 2025թ.-ի ապրիլի 3-ի ընդունելությունը:
Հայաստանի մշակույթի աշխատողների արհեստակցական կազմակերպությունների Ճյուղային հանրապետական միությունն իր կազմակերպած ամենամյա ընդունելությունների ժամանակ ՃՀՄ-ի պատվոգրով պարգևատրում է թատրոնների սպասարկող անձնակազմերի նախորդ տարվա լավագույն աշխատողներին, որոնց վերաբերյալ որոշումները կայացվում են կազմակերպությունների արհկոմների կողմից՝ տնօրենների հետ համաձայնեցված:
Այս տարի 2024թ. լավագույն աշխատողներին պատվոգրերի հետ միասին տրվեցին նաև դրամական պարգևներ , որոնք փոխանցվեցին նրանց աշխատավարձերի քարտերին՝ պահպանելով ‹‹Անկանխիկ գործառնությունների մասին›› ՀՀ օրենքի պահանջները:
Պարգևատրման հանդիսավոր արարողությունից հետո միջոցառումը շարունակվեց Թատրոնի օրվա առիթով բացված հյուրասիրության սեղանների շուրջ ջերմ և անմիջական զրույցներով, շնորհավորանքի և շնորհակալության խոսքերով՝ նորից հանդիպելու ակնկալիքով:
