Ընդունելությունը կազմակերպվել էր Թանգարանների միջազգային օրվա կապակցությամբ: Ավանդական դարձած այս միջոցառմանը մասնակցում էին ՀՀ թանգարանների 2021թ. լավագույն աշխատողները, որոնք տնօրենների և արհկոմների համատեղ որոշմամբ ներկայացվել էին Ճյուղային արհմիության պարգևատրմանը: Միջոցառման մասնակիցների թվում էին նաև նշված թանգարանների արհկոմների նախագահները և ՃՀՄ-ի աշխատակազմի անդամները:
Թանգարանների լավագույն աշխատողների պարգևատրումը ՃՀՄ-ի պատվոգրով և տոնական նվերներով ՀԱՄԿ-ի նիստերի դահլիճում կատարվեց հանդիսավոր պայմաններում: ՃՀՄ-ի նախագահ տիկին Ժ. Թորոսյանը ողջույնի խոսքով դիմեց ներկաներին, գնահատանքի խոսք ասաց պարգևատրման ներկայացվածներին, կարևորեց նրանց աշխատանքը հայկական մշակույթի զարգացման ու ճանաչման գործում և հանձինս նրանց շնորհավորեց ՀՀ թանգարանների բոլոր աշխատողներին: Պարգևատրման արարողությունից հետո ընդունելությունը շարունակվեց ՃՀՄ-ում՝ ֆուրշետի սեղանների շուրջ: Ընդունելության մասնակիցները շնորհավորեցին միմյանց իրենց մասնագիտական տոնի կապակցությամբ, ծանոթություններ հաստատեցին, լուսանկարվեցին և հրաժեշտ տվեցին իրար՝ հաջորդ տարի նորից հանդիպելու ակնկալիքով: Ընդունելությունն անցավ մտերմիկ և ջերմ մթնոլորտում:
