Հայաստանում առաջին անգամ անցկացվել է «Սոցիալական արդարության խթանումը. Աշխատանքի ապագան ներկայիս ժամանակաշրջանում» միջազգային համաժողով Աշխատանքի միջազգային կազմակերպության (ԱՄԿ) գլխավոր տնօրեն Գիլբերտ Հունգբոյի մասնակցությամբ։
Միջոցառմանը մասնացել են ՀՀ նախագահ Վահագն Խաչատուրյանը, ՀՀ վարչապետ Նիկոլ Փաշինյանը, Աշխատանքի և սոցիալական հարցերի նախարար Նարեկ Մկրտչյանը, Հայաստանի արհմիությունների կոնֆեդերացիայի նախագահ Էլեն Մանասերյանը, օրենսդիր և գործադիր մարմինների ներկայացուցիչներ, ինչպես նաև բարձրաստիճան պաշտոնյաներ՝ Արաբական Միացյալ Էմիրությունից, Կատարի Պետությունից, Հնդկաստանի Հանրապետությունից, Շվեդիայից, Սինգապուրից, Ուզբեկստանի Հանրապետությունից, Ֆրանսիայից և մի շարք այլ երկրներից։
Գիլբերտ Հունգբոն իր ելույթում ընդգծեց, որ չնայած առկա մարտահրավերներին և դժվարություններին, Հայաստանում նկատելի են աշխատանքի ոլորտում առկա զարգացումները։
«Հակամարտությունների և ճգնաժամերի հետևանքով մեծանում է գործազրկության մակարդակը, և մենք պետք է ամեն ինչ անենք, որ հաղթահարենք այս իրավիճակը։»,- նշել է Հունգբոն։
Միջոցառման երրորդ հատվածում իրականացվել են երեք պանելային քննարկումներ. «Սոցիալական արդարությունն ու կանանց տնտեսական հզորացումը» թեմայով քննարկմանը որպես բանախոս հանդես է եկել Հայաստանի արհմիությունների կոնֆեդերացիայի նախագահ Էլեն Մանասերյանը, ով իր խոսքում անդրադարձել է կանանց հզորացման և աշխատաշուկայում ներգրավման ճանապարհին հանդիպող խոչընդոտներին և դրանց հնարավոր լուծումներին, արհմիությունների դերակատարմանը՝ արժանապատիվ աշխատանքի, աշխատավայրում առողջ և անվտանգ պայմանների, աշխատանքի ոլորտում խտրականության և ոտնձգության կանխարգելման և վերացման ուղղությամբ:
