Մարտի 31-ին Հայաստանի արհմիությունների կոնֆեդերացիայի նախագահ Էլեն Մանսերյանը հյուրընկալեց Շվեդիայի զբաղվածության պետական ծառայության ծրագրերի ղեկավար Պեր Լինդբերգին, Շվեդիայի միգրացիոն գործակալության Միջազգային զարգացման համագործակցության բաժնի ղեկավար Կարլ-Մարտին Անդերսոնին, թվային ծառայությունների ավագ խորհրդատու Էլեն Բլանկին և խորհրդատու Ջոակիմ Էնգերին։
Միջազգային զարգացման համագործակցության բաժնի ղեկավար Կարլ-Մարտին Անդերսոնը շնորհակալություն հայտնեց հյուրընկալելու համար և ներկայացրեց ՀՀ աշխատանքի և սոցիալական հարցերի նախարարության, Միասնական սոցիալական ծառայության հետ իրականացվելիք ծրագրի մանրամասները։
Առանձնահատուկ կարևորելով Հայաստանի արհմիությունների կոնֆեդերացիայի դիրքորոշումը ծրագրի ավարտին ակնկալվող վերջնարդյունքների վերաբերյալ՝ Կարլ-Մարտին Անդերսոնը հատկապես ընդգծեց այն փաստը, որ Հայաստանի արհմիությունների կոնֆեդերացիայի հետ հանդիպումն առաջինն է սոցիալական գործընկերների հետ հետագա հանդիպումների շարքում։
Հանդիպմանը ներկա էր նաև բռնի տեղահանված, փախստականի կարգավիճակ ունեցող աշխատողների ՙՙՎերածնունդ՚՚ արհեստակցական կազմակերպության աշխատանքների համակարգող Արա Ղահրամանյանը, ով խոսեց Լեռնային Ղարաբաղի հանրապետությունից բռնի տեղահանված անձանց համար աշխատաշուկա ինտեգրման ճանապարհին առկա հիմնական խնդիրների և մասնագիտական որակավորումների տարբերությունների մասին։
Հայաստանի արհմիությունների կոնֆեդերացիայի նախագահ Էլեն Մանասերյանը շնորհակալություն հայտնեց հյուրերին Հայաստանի հանրապետության աշխատող քաղաքացու համար առավել բարենպաստ աշխատանքային պայմաններին ուղղված աշխատանքների և նման նախաձեռնության համար՝ հույս հայտնելով, որ նման հանդիպումներով և համատեղ աշխատանքով կանենք հնարավորինս՝ ի նպաստ Լեռնային Ղարաբաղի հանրապետությունից բռնի տեղահանված անձանց աշխատանքային պայմանների։
