Սիրելի՛ հայրենակիցներ,
Շուտով պատմություն կդառնա ևս մեկ տարի, որը լի էր անհանգստություններով ու դժվարություններով ամբողջ աշխարհի համար:
Ցավոք, 2022 թվականին էլ Հայաստանն ու Արցախը անմասն չմնացին ճգնաժամերից։ Այսօր էլ Արցախի մեր հայրենակիցները ստիպված են դիմավորել Ամանորը տոտալ շրջափակման պայմաններում ու արցախցի բազմաթիվ երեխաների համար Ամանորյա հրաշքը կնշանավորվեր իրենց ծնողների կողքին լինելով։ Սակայն ի հեճուկս բոլոր դժվարությունների՝ մեր հայրենակիցները շարունակում են ապրել ու արարել՝ ապացուցելով իրենց անկոտրուն ոգին ու կամքը։
Անկախ բոլոր դժվարություններին՝ արհմիությունների համար անցնող տարին կհիշվի նաև ձեռքբերումներով։
2022 թվականի ընթացքում Հայաստանի արհմիությունների կոնֆեդերացիան և անդամ Ճյուղային Հանրապետական միություններն ակտիվ աշխատանքներ են տարել աշխատանքային իրավահարաբերությունների ոլորտը կարգավորող իրավական ակտերի մշակման գործընթացում, սոցիալական գործընկերության և քաղհասարակության հարթակում՝ լսելի դարձնելով աշխատողների խնդիրներն ու առաջարկվող լուծումները, վերականգնվել են աշխատողների խախտված բազմաթիվ իրավունքներ։
Գալիք տարին արդեն իսկ լի է նոր մարտահրավերներով, որոնք հաղթահարելու համար անհրաժեշտ է մեկտեղել մեր ջանքերը, միասնաբար պայքարելով հանուն աշխատողների հիմնարար իրավունքների և բարօրության։
Սիրելի՛ բարեկամներ, սրտանց շնորհավորում եմ բոլորիդ Ամանորն ու Սուրբ Ծնունդը՝ մաղթելով խաղաղություն, սեր և ջերմություն բոլորիդ ընտանիքներում։
Հայաստանի արհմիությունների նախագահ Էլեն Մանասերյան
