Մայիսի 3-ին Հայաստանի արհմիույթունների կոնֆեդերացիայի շենքում մեկնարկեց ՀԱՄԿ-ի և Friedrich-Ebert հիմնադրամի համատեղ նախաձեռնությամբ բացված ԱՌԱՋՆՈՐԴՈՒԹՅԱՆ ԴՊՐՈՑԸ։

 Ծրագրի շրջանակում 20 մասնակիցներ տարբեր ոլորտներից 12 մոդուլների ընթացքում ձեռք կբերեն տեսական և պրակտիկ գիտելիքներ քաղաքացիական հասարակության զարգացման, աշխատանքային իրավունքների, արհմիությունների, կառավարման և առաջնորդության հմտությունների վերաբերյալ։

 Առաջին հանդիպման ընթացքում Ֆրիդրիխ էբերտ հիմնադրամի հայաստանյան գրասենյակի ծրագրերի համակարգող Լիանա Բադալյանը և ՀԱՄԿ-ի կազմակերպաուսումնական կենտրոնի ղեկավար Էլեն Մանասերյանը ներկայացրին կազմակերպությունների առաքելությունն ու դպրոցի նպատակները։ «Կայուն արժեքային համակարգն է ամուր քաղաքացիական հասարակության հիմքը, որն էլ իր հերթին կայուն պետություն կառուցելու երաշխիքն է։ Միայն ժողովրդավարական արժեքներին հավատարիմ և իրավագիտակից քաղաքացին կարող է զարգացնել կայացած ինստիտուտներ։ Հենց այդպիսի արժեքային համակարգ ենք պատրաստվում ուղենշել դպրոցի բոլոր մասնակիցների համար»,- նշում է Լիանա Բադալյանը։

 Էլեն Մանասերյանի խոսքով՝ ՀԱՄԿ-ը, լինելով ՀՀ-ում արհմիություններին միավորող միակ ազգային կենտրոնը և 18 ոլորտների Ճյուղային հանրապետական միությունների միջոցով միավորելով 196 հազար անդամների, նպատակ ունի բարձրացնել իրավագիտակցությունը աշխատանքային իրավունքների և ներառականության վերաբերյալ։ «Կարևոր է շեշտել, որ ժամանակակից Հայաստանում արհմիություններն ունեն բազմաթիվ մարտահրավերներ, - նշում է Էլեն Մանասերյանը, - ՀԱՄԿ-ի առաքելությունն է նաև օգնել արհմիություններին նորովի իմաստավորել սեփական դերն ու առաջնահերթությունները»։

 Դասընթացի վերջում բոլոր մասնակիցներին կտրամադրվեն սերտիֆիկատներ։