Ավստրալիայում ընթացող Արհմիությունների Միջազգային Կոնֆեդերացիայի (ԱՄԿ) 5-րդ համագումարում գլխավոր քարտուղար ընտրվեց Լուկա Վիսենտինին։
Ավելի, քան 1000 արհմիություններ աշխարհի 120 երկրներից հավաքվել են Ավստրալիայի Մելբուրն քաղաքում՝ քննարկելու արհմիությունների համաշխարհային օրակարգը։
Ահա Լուկա Վիսենտինի խոսքը՝ ուղղված համաշխարհային արհմիութենական շարժմանը․
«Շնորհակալ եմ վստահության համար և հպարտ եմ առաջնորդել ԱՄԿ-ն՝ լսելի դարձնելով աշխատողների ձայնը ամբողջ աշխարհում։ Մենք ապրում ենք պատմական ծանր ժամանակներում, երբ աշխարհը տնտեսական ճգնաժամի շեմին է․ շատերը կանգնած են աշխատանքը կորցնելու վտանգի առաջ, խաղաղությունն ու ժողովրդավարությունը վտանգի տակ են։
ԱՄԿ-ն կանի ամեն ինչ կյանքի կոչելու համար նոր տնտեսական մոդելը, որը հիմնված կլինի սոցիալական գործընկերության վրա։ Մենք պահանջում ենք արժանապատիվ աշխատանքային պայմաններ, աշխատանքային իրավունքներ, արդար աշխատավարձեր, սոցիալական ապահովություն, հավասարություն և ներառականություն։ Սա պետք է լինի աշխարհի բոլոր կառավարությունների օրակարգում»։
