Հայաստանի Հանրապետության առողջապահության նախարարությունը 2023 թվականի հոկտեմբերի 3-ին Իրավական ակտերի նախագծերի հրապարակման միասնական կայքում հրապարակել է «Բնակչության բժշկական օգնության և սպասարկման մասին» օրենքում լրացում կատարելու մասին» ՀՀ օրենքի նախագիծը:
Այս նախագծի ընդունմամբ 2023 թվականի սեպտեմբերի 19-ին Լեռնային Ղարաբաղի նկատմամբ Ադրբեջանի կողմից ռազմական հարձակման հետևանքով բռնի տեղահանված ավագ և միջին բուժաշխատողներին հնարավորություն կտրվի մինչև 2024 թվականի հոկտեմբերի 1-ը զբաղվել մասնագիտական գործունեությամբ առանց ՇՄԶ հավաստագրի, քանի որ Հայաստանի Հանրապետությունում գործող իրավակարգավորումների համաձայն՝ բժշկական օգնություն և սպասարկում իրականացնելու համար ավագ և միջին բուժաշխատողները պետք է ունենան ՇՄԶ հավաստագիր, որը հանդիսանում է վերջիններիս համար աշխատանքի թույլտվությունը փաստող փաստաթուղթ:
Լեռնային Ղարաբաղի օրենսդրությամբ բուժաշխատողների համար ՇՄԶ հավաստագիր ունենալու պահանջ նախատեսված չէ: Լեռնային Ղարաբաղից բռնի տեղահանված ավագ և միջին բուժաշխատողները կարող են սահմանված ժամանակահատվածում (մինչև 2024 թվականի հոկտեմբերի 1-ը) մասնակցել կրեդիտավորված դասընթացների՝ կուտակելով ՇՄԶ կրեդիտներ և ստանալ ՇՄԶ հավաստագիր։
Նշված ժամանակահատվածում առողջապահության բնագավառի վերահսկողություն իրականացնող տեսչական մարմինը Լեռնային Ղարաբաղից բռնի տեղահանված ավագ և միջին բուժաշխատողների նկատմամբ չի կիրառելու պատասխանատվություն ՇՄԶ հավաստագիր չունենալու հիմքով։
Այս նախագծի ընդունումը պայմանավորված է Լեռնային Ղարաբաղից բռնի տեղահանված ավագ և միջին բուժաշխատողներին աշխատատեղերով ապահովման անհրաժեշտությամբ:
Նախագծին կարող եք ծանոթանալ՝ հետևելով https://www.e-draft.am/projects/6312/about հղմանը:
