Հայաստանի Հանրապետության ագրոարդյունաբերության համակարգի աշխատողների ճյուղային հանրապետական միությունը Գյուղատնտեսի օրվա կապակցությամբ Սոլիդարիթի սենթր Հայաստանի գրասենյակի աջակցությամբ հոկտեմբերի 28-ին Երևանի Հոլիդեյ ինն հյուրանոցում կազմակերպել էր <Աշխատանքի անվտանգությունը գյուղատնտեսության ոլորտում> կլոր սեղան քննարկում: Այն համախմբել էր գյուղոլորտի շահագրգիռ կառույցներին, պետական և մասնավոր ընկերություններին՝ քննարկելու ոլորտում առկա անելիքներն ու խնդիրները, մասնավորապես ոլորտի աշխատողների առողջության պահպանման ու անվտանգության ապահովման, ինչպես նաև գյուղատնտեսության մեջ օգտագործվող թունաքիմիկատների և անհատական պաշտպանության միջոցների կիրարկմանն առնչվող հարցերը:
Միջոցառմանը ներկա էին Հայաստանի արհմիությունների կոնֆեդերացիայի /ՀԱՄԿ/ նախագահ Էլեն Մանասերյանը, ՀԱՄԿ- անդամ ՃՀՄ-ների նախագահներ Լաուրա Հակոբյանը, Գրիգոր Ղարիբյանը, Սրապիոն Առաքելյանը, Արիստակես Դանիելյանը, Լիլիթ Կարապետյանը, ՀՀ էկոնոմիկայի նախարարության գյուղատնտեսության ծրագրերի նախագծման վարչության պետ Իրինա Փանոսյանը, <Գյուղատնտեսական հետազոտությունների և հավաստագրման կենտրոն> ՊՈԱԿ-ի տնօրեն Դավիթ Բաբայանը, ՀՀ առողջապահական և աշխատանքի պետական տեսչության ներկայացուցիչ Ստեփան Շահումյանը, փարձագետներ, տարածքային արհմիության աշխատողների ներկայացուցիչներ:
Ողջունելով ներկաներին և շնորհավորելով նրանց Գուղատնտեսի օրվա կապակցությամբ Հայաստանի Հանրապետության ագրոարդյունաբերության համակարգի աշխատողների ճյուղային հանրապետական միության նախագահ Հասմիկ Ջհանգիրյանն իր խոսքում կարևորեց Հայաստանի Հանրապետության կողմից Աշխատանքի միջազգային կազմակերպության (ԱՄԿ) գյուղատնտեսության ոլորտում տեսչական վերահսկողության վերաբերյալ 129-րդ, և աշխատանքի անվտանգությունն ու հիգիենան գյուղատնտեսության ոլորտում սահմանող 184-րդ կոնվենցիաների վավերացումը:
Ողջույնի խոսքով հանդես եկավ նաև <Համերաշխության կենտրոն Հայաստանում> գրասենյակի ներկայացուցիչ Տետիանա Սոլոդովնիկը, միաժամանակ հույս հայտնելով, որ կենտրոնի և Ագրոարդյունաբերության համակարգի աշխատողների ճյուղային հանրապետական միության հետ համագործակցությունը կլինի շարունակական:
ՀԱՄԿ-ի նախագահ Էլեն Մանասերյանը Գյուղոլորտի աշխատողների մասնագիտական տոնի կապակցությամբ ողջունելով ներկաներին կարևորեց այդ ոլորտում աշխատողների արժանապատիվ աշխատանքի առկայությունը, աշխատանքային պայմանների անվտանգությունն ու դրանցով պայմանավորված առողջության ապահովման խնդիրների լուծումը: Բարձր գնահատելով ագրոարդյունաբերության համակարգի աշխատողների ՃՀՄ-ի գործունեությունը, նա նշեց, որ ԱՄԿ-ի վերոնշյալ կոնվենցիաների վավերացումը ենթադրում է նաև դրանց կիրակում: ՀԱՄԿ-ի նախագահը քննարկման մասնակիցներին մաղթեց արդյունավետ աշխատանք, խոստանալով Կոնֆեդերացիայի անվերապահ աջակցությունը ՃՀՄ-ների հետագա գործունեությանը:
Միջոցառման օրակարգային հարցերի շրջանակում քննարկվեցին ագրոքիմիկատների անվտանգ օգտագործման, դրանց վերաբերյալ տեղեկատվության տարածման կարևորության, հեռուստատեսությամբ գյուղոլորտի խնդիրներին առնչվող հաղորդումների ստեղծման վերաբերող հարցեր: Ցուցադրվեցին հանրապետության երկու մարզերում գյուղատնտեսության մեջ օգտագործվող թունաքիմիկատների և անհատական պաշտպանությաբն միջոցների վերաբերյալ Ագրոարդյունաբերության համակարգի աշխատողների ՃՀՄ-ի կատարված վերլուծության արդյունքներն ամփոփող տեսահոլովակներ:
Մասնագիտական տոնի կապակցությամբ գյուղատնտեսության ոլորտում մասնագիտական գիտելիքների փորձի ներդրման և արհմիութենական գործունեությանն աջակցելու համար Գառնիկ Պետրոսյանին հանձնվեց շնորհակալագիր, արհմիութենականգործում իրենց նվիրյալ աշխատանքի համար Մարտունու շրջանի տարածքային արհմիութենական կազմակերպության նախագահ Արմենուհի Մանուկյանը և Նաիրիի տարածքային արհմիութենական կազմակերպության նախագահ Վիկտորիա Հովհաննիսյանը պարգևատրվեցին ՀԱՄԿ-ի պատվո կրծքնշանով:
