Դեկտեմբերի 9-ին` երկօրյա կլոր սեղանի շրջանակում, կայացավ քննարկում Հայաստանում սոցիալական գործընկերության ոլորտում առկա իրավիճակի վերաբերյալ՝ ՀԱՄԿ-ի, ՀՀ Աշխատանքի և սոցիալական հարցերի նախարարության, Գործատուների միության և ԱՄԿ ներկայացուցիչների մասնակցությամբ։
Ողջույնի խոսքով հանդես եկան ՀՀ Աշխատանքի և սոցիալական հարցերի նախարարի առաջին տեղակալ Ռուբեն Սարգսյանը, ՀԱՄԿ նախագահ Էլեն Մանասերյանը, ԱՄԿ Եվրոպայի և Կենտրոնական Ասիայի հարցերով բաժնի վարիչ Սերգեյուս Գլավացկասը, ինչպես նաև Գործարարների Միության ներկայացուցիչը։
Քննարկվեցին Աշխատանքի առողջ և անվտանգ պայմանները կարգավորող ՀՀ կողմից վավերացված Աշխատանքի միջազգային կազմակերպության կոնվենցիաները, ինչպես նաև 155-րդ և 187-րդ հիմնարար կոնվենցիաների վավերացմանն ու կիրառմանը ուղղված ՀԱՄԿ-ի ռազմավարությունը։
«Կոնվենցիան վավերացնելը իհարկե ընդամենը գործի կեսն է։ Պետք է պատրաստել համապատասխան համակարգ և ենթակառուցվածքներ այն պատշաճ կերպով և հողի վրա կիրառելու համար․ սա է ամենակարևոր և ամենադժվար հատվածը», - նշեց Ռուբեն Սարգսյանը։ 
Օրվա երկրորդ հատվածում փորձագետ Արսեն իգիթյանը ներկայացրեց հետազոտություն՝ 2020-2021թթ․ ընթացքում աշխատողների  վրա ճգնաժամերի սոցիալ-տնտեսական ազդեցությունը  և այդ  ընթացքում արհմիությունների գործունեության  գնահատման  և  հեռանկարների վերլուծության արդյունքները։
Հագեցած քննարկումներ ծավալվեցին Հայաստանում սոցիալական գործընկերության ոլորտում առկա մարտահրավերերի, հնարավոր լուծումների, 2023թ․ օրակարգի և ժգնաժամների հաղթահարման շուրջ։
«Մենք ամեն ջանք պատրաստ ենք գործադրել կառուցելու համար արդյունավետ եռակողմ համագործակցություն արհմիությունների, գործատուների և պետության միջև։ Միմյանց մեջ հակառակորդ տեսնելու փոխարեն կարևոր է զարգացնել գործընկերային հարաբերություններ, որպեսզի համատեղ ուժերով լուծումներ տրվեն առկա խնդիրներին՝ դրանից կշահեն բոլորը», - շեշտեց Էլեն Մանասերյանը։