2025թ. դեկտեմբերի 2-4-ը Բրյուսելում անցկացվեց Արևելյան գործընկերության քաղաքացիական հասարակության ֆորումի Գագաթնաժողովը, որին մասնակցեցին քաղաքացիական հասարակության ավելի քան 250 ներկայացուցիչներ և որոշում կայացնողներ ԵՄ-ից և Արևելյան գործընկերության երկրներից:

Գագաթնաժողովի մոդերացիան այս տարի ևս վստահվել էր ՀԱՄԿ-ի նախագահ, ԱլԳ ՔՀԿ ֆորումի 5-րդ աշխատանքային խմբի համակարգող և ֆորումի մշտական հանձնաժողովի անդամ` Էլեն Մանասերյանին, ով հանդես եկավ ելույթով։ Ֆորումին հատուկ ելույթով հանդես եկավ նաև ՀՀ ԱԳ նախարար Արարատ Միրզոյանը։ 

Քաղաքացիական հասարակության գագաթնաժողովի նպատակն էր սահմանել  տարածաշրջանային համագործակցության օրակարգ Արևելյան գործընկերության հիմնական առաջնահերթությունների շրջանակներում կարևորագույն թեմաների շուրջ, ներառյալ՝ ժողովրդավարական և հասարակական դիմադրողականությունը, կայուն տնտեսական զարգացումը, անվտանգությունը և տարածաշրջանային կապակցվածությունը: Միջոցառումը ապահովեց  բարձր մակարդակի տեսանելիություն տարածաշրջանում քաղաքացիական հասարակության կազմակերպությունների (ՔՀԿ) կողմից իրականացվող աշխատանքին։
Միջոցառումը դարձավ ՔՀԿ-ների, Արևելյան գործընկերության երկրների կառավարությունների, ԵՄ անդամ պետությունների և ԵՄ ինստիտուտների միջև երկխոսության հարթակ։