2025 թվականի հուլիսի 16-17-ը Industriall Global Union միջազգային արհմիության գլխավոր քարտուղարի ասիստենտ Քեմալ Օզկանն աշխատանքային այցով գտնվում էր Հայաստանի Հանրապետությունում։
Այցի շրջանակում հուլիսի 16-ին կազմակերպվեց սեմինար՝ նվիրված «Industriall Global Union-ի անդամ կազմակերպությունների կարողությունների զարգացմանը Հայաստանում» թեմային։ Սեմինարը նախատեսված էր Արդյունաբերության աշխատողների արհեստակցական կազմակերպությունների ճյուղային հանրապետական միությանն (ՃՀՄ) անդամակցող շուրջ 16 կազմակերպության ներկայացուցիչների համար։
Միջոցառմանը մասնակցում էր Հայաստանի արհմիությունների կոնֆեդերացիայի նախագահ Էլեն Մանասերյանը, ով հանդես եկավ բացման խոսքով՝ ընդգծելով նման ձևաչափով հանդիպումների կարևորությունը և խթանելով մասնակիցների ակտիվ ներգրավվածությունը քննարկումներին։
Սեմինարի ընթացքում ծավալվեցին բազմակողմանի քննարկումներ արդյունաբերության ոլորտում առկա մարտահրավերների, սոցիալական գործընկերության զարգացման, ինչպես նաև առողջ և անվտանգ աշխատանքային միջավայրի ապահովման ուղղությամբ։
Բոլոր մասնակիցները բարձր գնահատեցին Industriall Global Union-ի և հայկական արհմիությունների միջև մինչ այժմ ձևավորված արդյունավետ և երկարատև համագործակցությունը։ Կողմերը վերահաստատեցին իրենց պատրաստակամությունը շարունակելու ու խորացնելու այդ համագործակցությունը։
Քննարկումներին մասնակցում էին նաև Industriall Global Union-ին անդամակցող «Էլեկտրաարհմիություն» արհեստակցական կազմակերպությունների ճյուղային հանրապետական միության նախագահ Կարինե Ալոյանը և Լեռնագործների, մետալուրգների և ոսկերիչների արհեստակցական կազմակերպությունների ճյուղային հանրապետական միության նախագահ Էդուարդ Փահլևանյանը։
Միջոցառման ավարտին ամփոփիչ ելույթով հանդես եկավ Արդյունաբերության աշխատողների արհեստակցական կազմակերպությունների ճյուղային հանրապետական միության նախագահ Արիստակես Դանիելյանը՝ շնորհակալություն հայտնելով բոլոր մասնակիցներին արդյունավետ համագործակցության և ակտիվ ներգրավվածության համար։
