Հայաստանում կանցկացվի «Լավագույն գործատու» ամենամյա մրցանակաբաշխություն

Հայաստանում պետական և հասարակական կառույցների համագործակցությամբ ամեն տարի կանցկացվի «Լավագույն գործատու» մրցանակաբաշխությունը: Հավակնորդներից կընտրվի և կկազմվի 10 լավագույն գործատուների վարկանիշային աղյուսակ։

 Նախաձեռնությունը կյանքի կոչելու համար «Արմենպրես»-ի մամուլի սրահում հրավիրված ասուլիսում ՀՀ առողջապահական և աշխատանքի տեսչական մարմնի, Հայաստանի արդյունաբերողների և գործարարների միության, Հայաստանի գործատուների հանրապետական միության, Հայաստանի արհմիությունների կոնֆեդերացիայի, «Մանթաշով գործարարների միության» միջև ստորագրվեց հուշագիր: ՀՀ առողջապահական և աշխատանքի տեսչական մարմնի ղեկավար Հակոբ Ավագյանը նշեց, որ իրենք ոչ միայն ստուգումներ են անցկացնում, անհրաժեշտության դեպքում՝ տուգանում ընկերություններին, այլև այս քայլով ներդնում են գործատուներին խրախուսելու մեխանիզմ:

 «Մեր մոտեցումն է կապը չկտրել հասարակական հատվածի, բիզնես ասոցիացիաների, արհեստակցական միությունների հետ: Ու որպեսզի չստացվի այնպես, որ տեսչական մարմինը գնում է միայն տուգանքների ճանապարհով, եղավ այս նախաձեռնությունը: Շնորհակալ եմ գործընկերներին, որ միացան նախաձեռնությանը: Տեսչական մարմինը, բացի տուգանելուց, նաև խրախուսման մեխանիզմ է ներդնում»,-ասաց Հակոբ Ավագյանը:

 Նախաձեռնությանը միացած կառույցների ներկայացուցիչները մինչև հաջորդ տարվա մարտ ամիսը կմշակեն «Լավագույն գործատու» մրցանակաբաշխության չափորոշիչները: Թե ի՞նչն է հաշվի առնվելու, նախաձեռնությունն իրականացնողները դեռ չեն շտապում ներկայացնել: Հակոբ Ավագյանը միայն նշեց, որ հաշվի կառնվի այն հանգամանքը, թե արդյոք այդ գործատուն իրենց տեսադաշտում հայտնվել է, բողոքներ եղել են տվյալ ընկերության հետ կապված: Կընտրվեն գործատուներ, որոնց մոտ տարվա ընթացքում խախտումներ չեն արձանագրվի, գործատուներ, որոնք տարվա ընթացքում աշխատանքային իրավունքի պահպանման մասով իրենց մոտ ներդրել են նոր մեխանիզմներ:

 Հայաստանի գործատուների հանրապետական միության նախագահ Գագիկ Մակարյանը նշեց, որ կշեշտադրեն նաև այն հանգամանքը, թե աշխատանքային ֆիզիկական պայմանները որքանո՞վ են բարելավվում, ի՞նչ քայլեր են ձեռնարկվում աշխատանքային իրավունքների պաշտպանության, վերապատրաստումների և այլ հարցերի հետ կապված: Նրա խոսքով՝ այս նախաձեռնությունը շատ կարևոր է, այն գործատուներին խրախուսելու քայլերից մեկն է:

 «Մենք կողմ ենք, որ լինեն աշխատանքային անվտանգության կառավարման, ռիսկերի գնահատման համակարգեր, ինչպես նաև՝ ներքին քաղաքականություն այդ պայմանների բարելավման համար: Այսօրվա աշխատուժի պակասը, խիստ մրցակցությունը նպաստել են, որ էականորեն փոխվի գործատուների մտածելակերպը: Ու այնպես չէ, որ գործատուները հակված են շահագործել իրենց աշխատողներին: Գործատուները շահագրգռված են, որ իրենց աշխատողները լինեն առողջ ու ապահովեն անհրաժեշտ արտադրողականությունը: Կարծում եմ, որ այս նախաձեռնությունը լավ խթան կհանդիսանա գործատուների համար»,-ասաց  Գագիկ Մակարյանը:  

 Նախնական տվյալներով՝ առաջին մրցանակաբաշխությունը կանցկացվի հաջորդ տարվա վերջին:

 

 Սկզբնաղբյուրը՝ armenpress.am

Վերջին նորություններ

Հայաստանի արհմիությունների կոնֆեդերացիայի ներկայացուցիչները մասնակցել են Հայաստան-ԵՄ քաղաքացիական հասարակության հարթակի 9-րդ հանդիպմանը

2026 թվականի նոյեմբերի 10-ին տեղի է ունեցել Հայաստան-ԵՄ քաղաքացիական հասարակության հարթակի 9-րդ հանդիպումը, որին մասնակցել են Հայաստանի արհմիությունների կոնֆեդե…
17/11/2026

Արհմիությունների մասնակցությունը տարածաշրջանային կապակցվածության զարգացման քննարկմանը․ առանցքային է արժանապատիվ աշխատանքով ապահովված տնտեսական առաջընթացը

Հայաստանի արհմիությունների կոնֆեդերացիայի Աշխատանքային և սոցիալական իրավունքների պաշտպանության բաժնի իրավաբան Աննա Բարիկյանը մասնակցել է Եվրոպական տնտեսական և ս…
17/11/2026

Կայուն գյուղատնտեսությունը սկսվում է նաև աշխատողների առողջության և իրավունքների պաշտպանությունից

Հոկտեմբերի 20-ին՝ COP17-ի շրջանակում, Հայաստանի արհմիությունների կոնֆեդերացիայի նախաձեռնությամբ Կարեն Դեմիրճյանի անվան մարզահամերգային համալիրում տեղի ունեցավ ա…
21/10/2026

Տեղեկույթ

2026թ. հոկտեմբերի 9-ին՝ ժամը 14:00-ին, Մշակույթի աշխատողների Ճյուղային հանրապետական միությունը ՀԱՄԿ-ի նիստերի դահլիճում հերթական անգամ նշեց ‹‹Ուսո…
20/10/2026
Տեսանյութեր
Սոցիալական գործընկերներ
Միջազգային գործընկերներ