2025 թվականի օգոստոսի 6-ին Հայաստանի արհմիությունների կոնֆեդերացիան և Ղրղզստանի արհմիությունների ֆեդերացիան ստորագրեցին համագործակցության հուշագիր։ Փաստաթուղթը նոր էջ է բացում երկու երկրների արհմիութենական կազմակերպությունների փոխհարաբերություններում՝ նպաստելով փորձի փոխանակմանը և համատեղ նախաձեռնությունների իրականացմանը։
Հուշագրի շրջանակում կողմերը պայմանավորվել են սերտորեն համագործակցել մի շարք ուղղություններով, մասնավորապես՝ աշխատողների սոցիալական և տնտեսական իրավունքների և շահերի պաշտպանության ոլորտում։ Արհմիութենական կազմակերպությունների միջև համագործակցության հիմնական ուղղություններն են՝ սոցիալական գործընկերության ձևերի ու մեթոդների մշակումը, սոցիալական և աշխատանքային հարաբերությունների կարգավորումը կոլեկտիվ բանակցությունների միջոցով, աշխատանքի առողջության, անվտանգության և էկոլոգիայի ոլորտներում փորձի փոխանակումը, արհմիութենական կրթության զարգացումը, համատեղ կրթական նախաձեռնությունների իրականացումը՝ ներառյալ դասընթացներ, սեմինարներ, ֆորումներ և կոնֆերանսներ։
Այս նախաձեռնությունն ընդգծում է կողմերի հանձնառությունն աշխատողների իրավունքների պաշտպանության և արհմիութենական շարժման զարգացման գործում։ Հուշագիրը հիմք կդառնա երկարաժամկետ ու արդյունավետ համագործակցության համար։