Ժնևում անցկացվում է Աշխատանքի միջազգային կազմակերպության (ԱՄԿ) Աշխատանքի միջազգային համաժողովի 114-րդ նստաշրջանը, որին մասնակցում են 187 անդամ երկրների պատվիրակությունները։
Հայաստանը ներկայացված է Աշխատանքի և սոցիալական հարցերի նախարարության, Հայաստանի արհմիությունների կոնֆեդերացիայի և Հայաստանի գործատուների հանրապետական միության ներկայացուցիչներով։
Հայաստանի արհմիությունների կոնֆեդերացիայի պատվիրակության կազմում են նախագահ Էլեն Մանասերյանը, Լեռնագործների, մետալուրգների և ոսկերիչների ճյուղային միության նախագահ Էդուարդ Փահլևանյանը, ինչպես նաև Արդյունաբերության աշխատողների ճյուղային միության նախագահ Արիստակես Դանիելյանը։
Էլեն Մանասերյանն իր ելույթում ընդգծել է, որ աշխատանքի աշխարհում ընթացող փոփոխությունները՝ տեխնոլոգիական զարգացումները, աշխատաշուկայի վերափոխումները և ժողովրդագրական մարտահրավերները, պահանջում են աշխատողների իրավունքները պահել տնտեսական և սոցիալական քաղաքականությունների կենտրոնում։ Նա կարևորել է արժանապատիվ աշխատանքի, սոցիալական պաշտպանության և աշխատանքի անվտանգության ապահովումը՝ ընդգծելով նաև Հայաստանում իրականացվող աշխատանքային բարեփոխումները և նվազագույն աշխատավարձի բարձրացումը։
Միաժամանակ նա նշել է ոչ ֆորմալ զբաղվածության, եկամուտների անկայունության և աշխատանքի նոր ձևերի հետ կապված խնդիրները՝ առանձնացնելով երիտասարդների համար որակյալ զբաղվածության և մասնագիտական զարգացման հնարավորությունների անհրաժեշտությունը։
Եզրափակելով՝ Հայաստանի արհմիությունների կոնֆեդերացիայի նախագահը վերահաստատել է արհմիությունների պատրաստակամությունը շարունակելու համագործակցությունը ԱՄԿ-ի, կառավարության և գործատուների հետ՝ արժանապատիվ աշխատանքի, սոցիալական արդարության և աշխատավորների կյանքի որակի բարելավման նպատակով։
