Հայաստանի Հանրապետության Երևան քաղաքի առաջին ատյանի ընդհանուր իրավասության քաղաքացիական դատարանը բավարարել է «Հայանտառ» ՊՈԱԿ-ի արհեստակցական կազմակերպության անդամ, «Հայանտառ» ՊՈԱԿ-ի գործունեության վերլուծության և զարգացման ծրագրերի բաժնի գլխավոր մասնագետ Ա.Գ.-ի հայցն ընդդեմ «Հայանտառ» ՊՈԱԿ-ի՝ կարգապահական տույժ կիրառելու, աշխատանքային պայմանագիրը միակողմանի լուծելու և աշխատանքից ազատելու հրամանն անվավեր ճանաչելու, նախկին աշխատանքում վերականգնելու, իսկ աշխատանքում վերականգնելու անհնարինության դեպքում` հատուցում տրամադրելու պահանջների մասին: Դատարանում Ա.Գ.-ի աշխատանաքային իրավունքների պաշտպանությունը ստանձնել է Հայաստանի արհմիությունների կոնֆեդերացիայի և «Սոլիդարիթի Սենթեր» հայաստանյան մասնաճյուղի համագործակցության շրջանակներում Հայաստանի Հանրապետության փաստաբանների պալատի անդամ փաստաբան Նաիրա Համբարձումյանը:
 Դատարանը վճռեց՝ հայցը բավարարել, անվավեր ճանաչել «Հայանտառ» ՊՈԱԿ-ի տնօրենի պաշտոնակատարի 13.10.2022 թվականի թիվ 1592-Ա հրամանը, Ա.Գ.-ին վերականգնել նախկին աշխատանքում  և պարտավորեցնել պատասխանողին Ա. Գ.-ին վճարել հատուցում՝ հարկադիր պարապուրդի ամբողջ ժամանակահատվածի համար՝ միջին աշխատավարձի չափով, սկսած 13․10․2022 թվականից մինչև աշխատանքում փաստացի վերականգնելը, ինչպես նաև պատասխանողից Հայաստանի Հանրապետության պետական բյուջե բռնագանձել 40.000 (քառասուն հազար) ՀՀ դրամ, որպես վճարման ենթակա պետական տուրքի գումար:
 Տեղեկատվություն. Վճիռը կամովին չկատարելու դեպքում այն կկատարվի դատական ակտերի հարկադիր կատարման ծառայության միջոցով` պարտապանի հաշվին: Վճիռն օրինական ուժի մեջ է մտնում հրապարակման պահից մեկ ամիս հետո և կարող է բողոքարկվել Հայաստանի Հանրապետության վերաքննիչ քաղաքացիական դատարան` վճռի հրապարակման պահից մեկամսյա ժամկետում: