Ապրիլի 28-ին Հայաստանի արհմիությունների կոնֆեդերացիայի Կազմակերպաուսումնական կենտրոնի և ՀԱՄԿ-ի խորհրդին կից Երիտասարդական հանձնաժողովի նախաձեռնությամբ Երևանի Ն.Աճեմյանի անվան տարածաշրջանային թիվ 2 քոլեջի սովորողների հետ տեղի ունեցավ հանդիպում, որը վարում էր Կենտրոնի ղեկավար Էլեն Մանասերյանը:
Հանդիպման ընթացքում սովորողները ծանոթացան ՀՀ Աշխատանքային օրենսգրքի հիմնական դրույթներին, ինչպես նաև աշխատողների աշխատանքային իրավունքների, աշխատանքային պայմանագրի, առողջ և անվտանգ աշխատանքային պայմանների հետ:
Էլեն Մանասերյանը հանդիպման մասնակիցներին ներկայացրեց աշխատողների աշխատանքային իրավունքներն ու շահերը առավել արդյունավետ ներկայացնելու և պաշտպանելու նպատակով արհմիությանն անդամակցելու կարևորությունը, ինչպես նաև պատասխանեց հանդիպման մասնակիցների հարցերին:
Միջոցառման ընթացքում Երիտասարդական հանձնաժողովի նախագահ Էդգար Չախոյանն իր խոսքում անդրադարձավ հանձնաժողովի աշխատանքներին և կարևորեց արհմիությունների դերը աշխատողների աշխատանքային իրավունքների պաշտպանության գործում:
