2022 թվականի հոկտեմբերի 26-ին Հայաստանի արհմիությունների կոնֆեդերացիայի (ՀԱՄԿ) նախագահ Էլեն Մանասերյանը ընդունեց Արժանապատիվ աշխատանքի տեխնիկական աջակցության խմբի և Արևելյան Եվրոպայի և Կենտրոնական Ասիայի Աշխատանքի միջազգային կազմակերպության գրասենյակի գենդերային հավասարության և խտրականության դեմ հարցերով մասնագետ Օզգե Բերբեր Ագտաշին, աշխատանքի վարչարարության, աշխատանքի տեսչության և աշխատանքի անվտանգության ու առողջության հարցերով մասնագետ Անտոնիո Սանտոսին, Աշխատանքի միջազգային կազմակերպության (ԱՄԿ) ազգային համակարգող Նունե Հովհաննիսյանին և ԱՄԿ ծրագրի համակարգող Նվեր Սարգսյանին:
Հանդիպմանը մասնակցեցին նաև ՀԱՄԿ-ի նախագահի տեղակալ Բորիս Խարատյանը, սոցիալ-տնտեսական և աշխատանքի պաշտպանության բաժնի պետ Լաուրա Դեմիրչյանը և իրավաբանական բաժնի իրավախորհրդատու Աննա Բարիկյանը:
Հանդիպման ընթացքում քննարկվեցին կին և տղամարդ աշխատողների իրավահավասարությունն ապահովելու նպատակով հետագա համագործակցությունը, «Անվտանգություն+առողջություն բոլորի համար» ծրագրի հայեցակարգը, որն ուղղված է Հայաստանում աշխատողների համար առողջ և անվտանգ աշխատանքային պայմանների ապահովմանը և ՀՀ առողջապահական և աշխատանքի տեսչական մարմնի գործունեությանը, ինչպես նաև Հայաստանում սոցիալական գործընկերության արդյունավետությունը, աշխատողների առողջության պահպանման և անվտանգության ապահովման կանոնների և նորմերի ներդրման անհրաժեշտությունը:
Հանդիպման մասնակիցները կարևորեցին Հայաստանի Հանրապետության կողմից ԱՄԿ թիվ 155-րդ, 187-րդ և 190-րդ կոնվենցիաների վավերացման անհրաժեշտությունը և հետագայում դրանց կիրարկումը:
Մասնակիցները բարձր գնահատեցին ԱՄԿ-ի և ՀԱՄԿ-ի միջև ձևավորված սերտ համագործակցությունը և պատրաստակամություն արտահայտեցին համագործակցությունն ամրապնդելու և զարգացնելու համար:
