2025 թվականի դեկտեմբերի 10-ին Հայաստանի արհմիությունների կոնֆեդերացիան հյուրընկալեց Արհմիությունների միջազգային կոնֆեդերացիայի (ITUC) գլխավոր քարտուղար Լյուկ Թրայանգլին, ում այցը նպատակ ուներ խորացնել համագործակցությունը և քննարկել աշխատողների սոցիալական պաշտպանությանը վերաբերող մարտահրավերները։
Պարոն Թրայանգլը հանդիպեց ՀԱՄԿ-ի նախագահ՝ Էլեն Մանասերյանի և ՀԱՄԿ-ի անդամ ճյուղային հանրապետական միությունների նախագահների հետ։
Հանդիպման ընթացքում քննարկվեցին ՀՀ աշխատանքային իրավունքների պաշտպանության մի շարք կարևոր հարցեր, այդ թվում՝ սոցիալական երկխոսության զարգացումը, աշխատողների տնտեսական և սոցիալական երաշխիքների ուժեղացումը, ինչպես նաև արհմիությունների կարողությունների ընդլայնումը։
Քննարկվեց նաև նվազագույն աշխատավարձի ներկայիս ցածր շեմը, որը չի համապատասխանում նվազագույն կենսապահովման ցուցանիշին և շարունակում է մնալ արհմիությունների հիմնական մտահոգություններից մեկը։ Հայաստանի արհմիությունների կոնֆեդերացիայի նախագահ Էլեն Մանասերյանը շեշտեց, որ գործող չափը չի ապահովում աշխատողի և նրա ընտանիքի արժանապատիվ կյանքը՝ ընդգծելով, որ սա խորացնում է սոցիալ-տնտեսական անհավասարությունը և նպաստում է երիտասարդների արտագաղթի աճին։
Էլեն Մանասերյանի նախաձեռնությամբ պարոն Թրայանգլը հանդիպեց նաև Աշխատանքի և սոցիալական հարցերի նախարարի տեղակալ՝ Լուսինե Քոչարյանի և Ազգային Ժողովի աշխատանքի և սոցիալական հարցերի մշտական հանձնաժողովի նախագահ`Հերիքնազ Տիգրանյանի հետ։
Կողմերը կարևորեցին համագործակցությունը սոցիալական գործընկերության շրջանակներում, օրենքների փոփոխությունները և արհմիությունների դերի կարևորությունը քաղաքականությունների արդյունավետ մշակման գործընթացում, համագործակցությունը՝ աշխատողների իրավունքների պաշտպանության, եկամտային քաղաքականության արդիականացման և երիտասարդության համար արժանապատիվ աշխատանքի հնարավորությունների ընդլայնման ուղղությամբ։
Լյուկ Թրայանգլը բարձր գնահատեց Հայաստանի արհմիությունների կոնֆեդերացիայի հետևողական աշխատանքը՝ նշելով, որ արժանապատիվ աշխատավարձի և աշխատանքի պայմանների բարելավումը պետք է դառնա պետական-սոցիալական քաղաքականության առաջնահերթություն։
Լյուք Թրայանգլը այցելեց նաև Մելանտե ՍՊԸ և Արարատ կոնյակի գործարան և հանդիպեց արհմիության ներկայացուցիչների հետ։
Այցի ավարտին պարոն Թրայանգլը և տիկին Մանասերյանը կարևորեցին շարունակական գործընկերությունը՝ նպատակ ունենալով զարգացնել այն մեխանիզմները, որոնք կնպաստեն աշխատողի մասնագիտական կայացմանն ու կայուն աշխատատեղերի ստեղծմանը երկրում։
