Հայաստանի արհմիությունների կոնֆեդերացիայի նախագահ Էլեն Մանասերյանը 2023թ. ապրիլի 5-ին ընդունել է ԱՄՆ առևտրի ներկայացուցչի արտոնությունների ընդհանրացված համակարգի հարցերով փոխտեղակալ Լորա Բուֆֆոյին, ԱՄՆ առևտրի ներկայացուցչի Եվրոպայի և Միջին Արևելքի գրասենյակի տնօրեն Ջեյսոն Բանթինին, ԱՄՆ դեսպանատան տնտեսական հարցերով պատասխանատու Էրիկ Մարկովսին և ԱՄՆ դեսպանատան տնտեսական հարցերով մասնագետ Ալեքսեյ Հովակիմյանին:
Հանդիպմանը մասնակցեցին ՀԱՄԿ-ի աշխատակազմի ուսումնահետազոտական կենտրոնի ղեկավար Վարդուհի Բրուտյանը և ՀԱՄԿ-ի աշխատակազմի աշխատանքային և սոցիալական իրավունքների պաշտպանության բաժնի պետ Լաուրա Դեմիրչյանը:
ՀԱՄԿ-ի նախագահ Էլեն Մանասերյանը ներկայացրեց Հայաստանի արհմիությունների կոնֆեդերացիայի կառուցվածքը և գործունեությունը:
ԱՄՆ առևտրի ներկայացուցչի արտոնությունների ընդհանրացված համակարգի հարցերով փոխտեղակալ Լորա Բուֆֆոն ներկայացրեց GSP համակարգի միջոցով հայաստանյան ապրանքների ԱՄՆ արտահանման հնարավորությունները և նշեց, որ GSP համակարգից օգտվող երկրները պետք է ապահովեն մի շարք պայմանների համապատասխանեցումը միջազգային ստանդարտներին, որոնցից մեկը աշխատանքային իրավունքներին վերաբերող պայմաններն են։
Կողմերը քննարկեցին Հայաստանի Հանրապետությունում աշխատանքային իրավահարաբերություններին, սոցիալական գործընկերությանը, գործադուլի իրավունքին, Առողջապահական և աշխատանքի տեսչական մարմնի լիազորություններին առնչվող հարցերը, առկա իրավիճակը և խնդիրները:
