ՀՀ Կառավարությունը 2024 թվականի օգոստոսի 29-ի նիստում հավանություն է տվել «ՀՀ աշխատանքային օրենսգրքում փոփոխություններ և լրացումներ կատարելու մասին» և «Տեսալսողական մեդիայի մասին» օրենքում փոփոխություն կատարելու մասին» օրենքների նախագծերին։ Ներկայացվող փոփոխություններով նախատեսվում է ՀՀ-ում ներդնել աշխատանքային պայմանագրերի կնքման թվային համակարգ։
Սեպտեմբերի 12-ին «Մեդիա կենտրոն»-ում տեղի է ունեցել «Աշխատանքային պայմանագրերի թվայնացում․ աշխատանքային խախտումների իրական լուծո՞ւմ, թե՞ կոսմետիկ բարեփոխում» թեմայով քննարկում։ Քննարկման բանախոսներն էին ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը, Առողջապահական և աշխատանքի տեսչական մարմնի ղեկավարի տեղակալ Վահագն Գրիգորյանը և Հայաստանի արհմիությունների կոնֆեդերացիայի նախագահ Էլեն Մանասերյանը։
Հայաստանի արհմիությունների կոնֆեդերացիայի նախագահ Էլեն Մանասերյանը խոսել է, թե ինչպես առաջարկվող փոփոխությունները կարող են ազդել աշխատողների վրա և ներկայացրել է համակարգի ներդրման հնարավոր դրական և բացասական հետևանքները։
