2023 թ նոյեմբերի 7-8-ը Մոլդովայի մայրաքաղաք Քիշնևում կայացել է Համաեվրոպական արհմիությունների խորհրդի Կանանց դպրոցը (PERC Women’s School) «Խոցելի խմբերը և գենդերային վարձատրության/կենսաթոշակային և այլ բացերի վերացման քաղաքականությունը» թեմայով:
Բացման խոսքով հանդես է եկել Մոլդովայի արհմիությունների կոնֆեդերացիայի նախագահ Իգոր Զուբկուն՝ ընդգծելով գենդերային քաղաքականության ոլորտում դեռևս գոյություն ունեցող անհավասարությունների դեմ պայքարի կարևորությունը, Քիշնևում կայացած հանդիպումը համարելով լավ հարթակ քննարկումների համար:
Հայաստանի արհմիությունների կոնֆեդերացիան ներկայացրել է ՀԱՄԿ-ի աշխատանքային հարաբերություններում հավասարության հարցերով հանձնաժողովի անդամ Մերի Սարգսյանը, ով կլոր սեղան-քննարկման ժամանակ ներկայացրեց ՀՀ կոնֆեդերացիայում, հավասարության հանձնաժողովի շրջանակներում կատարված և կատարվելիք աշխատանքները, կանանց ներգրավվածությունը և նաև առանձնացրեց առկա խնդիրներն ու խոցելի խմբերը, որոնք կային և ավելացել են 2020 թվականի պատերազմից հետո և 2023 թվականին Արցախի բնակչության բռնի տեղահանման արդյունքում:
