Հայաստանի արհմիությունների կոնֆեդերացիան և Ֆրիդրիխ Էբերտ հիմնադրամը ս․թ․ մայիսի 24-26-ը համատեղ իրականացրեցին Արհմիութենական ամառային դպրոցը։

Արհմիութենական եռօրյայի ընթացքում մասնակիցները ծանոթացան արհմիության նպատակներին և գործառույթներին, աշխատանքային միջավայրում կոնֆլիկտների կառավարմանը, աշխատավայրում ճգնաժամային իրավիճակների կառավարմանը, արհմիությունների դերին աշխատավայրում խտրականության վերացման գործընթացում, աշխատավայրում բռնության և ոտնձգության բացառմանն ուղղված քայլերին։

Բուռն քննարկումների, ընդգրկուն դասընթացների, ակտիվ խաղերի և համերաշխության մթնոլորտում ծնվեցին բազում գաղափարներ, որոնց իրագործումը հնարավորություն կտա ունենալ առավել անխոչընդոտ, առողջ և անվտանգ աշխատանքային պայմաններ։

Արհմիութենականները ավարտական սերտիֆիկատներով պարգևատրվեցին Հայաստանի արհմիությունների կոնֆեդերացիայի նախագահ Էլեն Մանասերյանի կողմից։