Իրավունքների համաշխարհային ինդեքսն աշխատողների իրավունքների խախտման միակ համապարփակ և տարեկան հրապարակվող գլոբալ զեկույցն է, որը կազմվում է Արհմիությունների միջազգային կոնֆեդերացիայի (ITUC) կողմից։ 2025 թվականի զեկույցը վկայում է, որ աշխարհի տարբեր երկրներում աշխատողների և արհմիությունների իրավունքների խախտումները խորանում են՝ ստեղծելով գլոբալ ճգնաժամ։
Այս տարի զեկույցում ուսումնասիրվել է 151 երկիր, և դրանցից միայն 7-ն են արժանացել լավագույն՝ 1 գնահատականին։ Արհմիությունների միջազգային կոնֆեդերացիայի կարծիքով այս ցուցանիշը մտահոգիչ է և կապ ունի աշխարհում ավտորիտար կառավարությունների աճի հետ։ Զեկույցում առանձնացվել է նաև աշխատողների իրավունքների խախտումների առումով ամենավատ 10 երկրների ցանկը, որտեղ ներառվել են Բելառուսը և Թուրքիան։
Արհմիությունների միջազգային կոնֆեդերացիայի գլխավոր քարտուղար Լյուկ Թրայանգլն իր խոսքում ընդգծել է, որ գլոբալ մակարդակով տեսանելի է աշխատողների իրավունքների շարունակական վատթարացումը։ Նա նշում է, որ սա հարձակում է ինչպես ժողովրդավարության, այնպես էլ աշխատողների իրավունքների վրա, ինչը հատկապես բնորոշ է ավտորիտար կառավարությունների աճին։
Հայաստանի Հանրապետությունն այս տարի արժանացել է 3 գնահատականի, ինչը նշանակում է, որ թե՛ օրենսդրության, և թե՛ գործնական հարթակներում առկա են թերություններ։ Զեկույցում հատկապես ընդգծվել է գործադուլի իրավունքի իրացման սահմանափակումը։
Զեկույցին անդրադարձել է ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը, իսկ Հայաստանի արհմիությունների կոնֆեդերացիայի նախագահ Էլեն Մանասերյանը ներկայացրել է իր դիրքորոշումը և անդրադարձել է Հայաստանում գործադուլի իրավունքի իրացման դժվար ընթացակարգին։