Աշխատանքի միջազգային կազմակերպության նախաձեռնությամբ յուրաքանչյուր տարի ապրիլի 28-ը նշվում է որպես աշխատանքի անվտանգության և առողջության համաշխարհային օր, որի նպատակն է նպաստել աշխատավայրում դժբախտ դեպքերի և մասնագիտական հիվանդությունների կանխարգելմանը:
Աշխատանքի անվտանգության և առողջության 2026թ. համաշխարհային օրվա թեման է՝ «Եկեք ապահովենք առողջ հոգեսոցիալական աշխատանքային միջավայր»։
Այն ընդգծում է, որ աշխատավայրի հոգեսոցիալական միջավայրը ձևավորվում է աշխատանքի կազմակերպման, կառավարման և ամենօրյա աշխատանքային պայմանների միջոցով։
Այսօր ավելի ակնհայտ է դառնում, որ աշխատավայրում մարդու առողջությունը կախված է ոչ միայն ֆիզիկական պայմաններից, այլև աշխատանքային հարաբերություններից և կառավարման մշակույթից։ Այն, թե ինչպես է կազմակերպվում աշխատանքը, որքան հստակ են սահմանված պարտականությունները, ինչպես է բաշխվում ծանրաբեռնվածությունը և ինչ մակարդակի աջակցություն է ստանում աշխատողը, ուղղակիորեն ազդում են նրա հոգեկան և ֆիզիկական վիճակի վրա։
Անբարենպաստ հոգեսոցիալական պայմանները կարող են առաջացնել լարվածություն, սթրես և աշխատունակության անկում։ Եթե այդ գործոնները ժամանակին չեն գնահատվում և չեն կառավարվում, դրանք վերածվում են իրական ռիսկերի՝ ազդելով ինչպես աշխատողի առողջության, այնպես էլ կազմակերպության ընդհանուր արդյունավետության վրա։ Այդ պատճառով կարևոր է, որ գործատուները հոգեսոցիալական ռիսկերի կառավարումը դիտարկեն որպես աշխատանքի անվտանգության համակարգի անբաժանելի մաս։
Հայաստանի արհմիությունների կոնֆեդերացիան կարևորում է այնպիսի աշխատանքային միջավայրի ձևավորումը, որտեղ ապահովված են արդար մոտեցումները և փոխադարձ հարգանքը։ Միայն համակարգված և պատասխանատու մոտեցմամբ կարելի է ապահովել կայուն, անվտանգ և արժանապատիվ աշխատանքային պայմաններ։
ՀԱՅԱՍՏԱՆԻ ԱՐՀՄԻՈՒԹՅՈՒՆՆԵՐԻ ԿՈՆՖԵԴԵՐԱՑԻԱ
