ԱՄԿ իրավակարգավորումները փաստում են, որ գործադուլի իրավունքը գործում է միջազգային իրավունքի հովանու ներքո՝ համաձայն ԱՄԿ 87 (Միավորման ազատության և կազմակերպելու իրավունքի պաշտպանության մասին) և 98 (Կոլեկտիվ բանակցություններ կազմակերպելու և վարելու իրավունքի սկզբունքների կիրառման մասին) կոնվենցիաների:
Շուրջ 10 տարի է ԱՄԿ-ում խնդրի շուրջ փակուղի է՝ աշխատողների և գործատուների ներկայացուցիչների միջև:
Համաձայն ԱՄԿ Կանոնադրության՝ նման հարցերը պետք է ուղարկվեն Արդարադատության միջազգային դատարան։
Նոյեմբերի 10-ին Կառավարման մարմնում կայացած քվեարկության ժամանակ 19 կառավարության ներկայացուցիչները աշխատողների 14 պատվիրակների հետ միասին կողմ քվեարկեցին խնդիրը Արդարադատության միջազգային դատարան ուղարկելու համար:
Ընդամենը յոթ ներկայացուցիչներ քվեարկել են գործատուների խմբի հետ, որտեղ ներգրավված են 14 անդամներ, միաժամանակ երկու կառավարությունները մնացել են ձեռնպահ:
Արհմիությունների միջազգային կոնֆեդերացիայի Գլխավոր քարտուղար Լյուկ Թրիանգլն ասել է. «Գործադուլի իրավունքը հիմնարար է աշխատողների համար արդար համաձայնության հասնելու և, ինչպես ցույց է տալիս պատմությունը, ժողովրդավարության համար: Մենք ողջունում ենք այս որոշումը և անհամբեր սպասում ենք մեր գործն Արդարադատության միջազգային դատարան ներկայացնելուն: Մենք վստահ ենք, որ այս գործընթացը կվավերացնի միջազգային իրավունքում ԱՄԿ-ի գործադուլի իրավունքի տասնամյակների իրավաբանական պրակտիկան»:
